Go Back

Aroma Chapter 3

• 1. GWATUĨKA ũguo-rĩ, Mũyahudi agĩkĩrĩte andũ arĩa angĩ na kĩ? O na kana ũhoro wa kũrua-rĩ, ũkĩrĩ na ũguni ũrĩkũ?
• 2. Hĩ! ũguni no mũnene na njĩra ciothe: o mbere, nĩ ũndũ Ayahudi nĩo maatuirũo aramati a mauuge marĩa ma Ngai.
• 3. O na gwagĩtuĩka atĩ amwe ao maakorirũo matarĩ a kwĩhokeka-rĩ, githĩ ũhoro wao wa kwaga kwĩhokeka wahota gũthahia wĩhokeku wa Ngai?
• 4. Hĩ, kũroaga gũtuĩka ũguo! Ngai arotuĩka no wa ma, na mũndũ o wothe atuĩke wa maheni; o ta ũrĩa haandĩkĩtwo, atĩrĩ: Gũtuĩke atĩ Wee, wagwata kwaria, nĩ kĩhooto ũrĩ nakĩo, Kũhootana ũkĩhootane hĩndĩ ĩrĩa ũngĩcirũo nawe.
• 5. No rĩrĩ, ũhoro witũ wa kwaga gũtuĩka athingu wagĩkorũo nĩũgathithagia ũthingu wa Ngai-rĩ, twagĩcoka kuuga atĩa? Anga Ngai nĩaagaga gũtuĩka mũthingu nĩ ũndũ wa gũtũkoria marakara? (Hau kaĩ ndaaria ta ũrĩa andũ a thĩ mangĩaria-ĩ!)
• 6. Kũroaga gũtuĩka ũguo! Tondũ kũngĩkorũo nĩ ũguo-rĩ, Ngai aakĩhota gũcirithia kĩrĩndĩ gĩothe gĩa thĩ atĩa?
• 7. No ningĩ, kũngĩkorũo kũhenania gwakwa nĩgũtũmaga Ngai agoocwo, nĩ gũgĩtũma ũhoro-wa-ma wake wonekane o makĩria-rĩ, niĩ ngũgĩtũũra ndĩ wa gũtuĩrũo ta ndĩ mwĩhia nĩ ũndũ kĩ?
• 8. Na nĩ kĩ kĩngĩkĩgiria tuuge atĩrĩ, Nĩtwĩkage ũũru nĩ getha wega woneke (o ta ũrĩa tũcambagio, tũkĩĩragwo nĩ andũ amwe atĩ nĩguo tuugaga)? Nao arĩa a kuuga ũguo-rĩ, ituĩro rĩao rĩa kũherithio rĩĩ na kĩhooto.
• 9. Rĩu nĩ atĩa? Ithuĩ Ayahudi nĩ gũkĩra tũkĩrĩte andũ arĩa angĩ? Aca, gũtirĩ! tondũ-rĩ, hau mbere nĩtuonanirie atĩ Ayahudi o na Ayunani, othe-rĩ, matũire magũĩte hinya-inĩ wa mehia;
• 10. o ta ũrĩa kwandĩkĩtwo, atĩrĩ: Gũtirĩ mũndũ mũthingu o na ũmwe:
• 11. Gũtirĩ mũndũ ũrĩ ũndũ amenyaga, gũtirĩ ũrongoragia Ngai;
• 12. Othe nĩmarĩkĩtie kwehũka, othe hamwe magagĩtuĩka andũ matarĩ bata; gũtirĩ wĩkaga wega, gũtirĩ o na ũmwe.
• 13. Mĩmero yao ĩhaana ta mbĩrĩra iceng’ũ; nĩmĩ ciao ihũthagĩra o maheni: thĩinĩ wa mĩromo yao nĩ ũrũrũ wa nduĩra harĩ.
• 14. Ningĩ atĩrĩ, Tũnua twao tũiyũraga irumi o na ciugo iria ndũrũ.
• 15. Mahanyũkaga mũno na magũrũ mathiĩ magaite thakame;
• 16. Mwanangĩko o na mwĩthikĩro nĩcio igĩaga njĩra-inĩ iria makinyaga.
• 17. Nayo njĩra ya thayũ matimĩũĩ.
• 18. Maitho-inĩ mao-rĩ, hatirĩ na ũhoro wa gwĩtigĩra Ngai.
• 19. Rĩu-rĩ, nĩtũũĩ atĩ mohoro mothe marĩa watho uugĩte, merĩtwo arĩa maatuĩrĩirũo watho ũcio; nĩ getha tũnua tuothe tũtumio, nao andũ othe a thĩ matuĩke a gũcirithio nĩ Ngai.
• 20. Amu-rĩ, mbere ya Ngai gũtirĩ mũndũ ũngĩtuwo mũthingu nĩ ũndũ wa gwĩkaga maũndũ marĩa maathane watho-inĩ, nĩ gũkorũo watho no gũtũma ũtũmaga andũ mamenye o wega atĩ nĩmehagia.
• 21. No rĩu ũthingu wa Ngai nĩwonanĩtio na ũndũ ũngĩ, thengia ũhoro ũcio wa watho, naguo watho o ũcio, o nao anabii-rĩ, nĩ aira aguo;
• 22. na nĩguo ũthingu wa Ngai ũrĩa ũheagwo andũ othe arĩa metĩkĩtie, ũgakĩgĩo naguo na njĩra ya kwĩhoka Jesu Kristo. Amu ũhoro wa gũthurania andũ gũtirĩ;
• 23. nĩ gũkorũo andũ othe maanahĩtia, magakĩaga gũkinyĩrĩra riri wa Ngai,
• 24. na tondũ wa Wega wake magatuagwo athingu o ũguo, tũhũ, nĩ ũndũ wa ũrĩa maakũũrirũo nĩ Kristo Jesu.
• 25. Ũcio nĩwe Ngai oimĩririe atuĩke ihaki nĩ kũruta thakame yake, narĩo rĩtuĩke rĩa kũrehithie ũiguano kũrĩ arĩa mangĩkorũo marĩĩtĩkĩtie; agĩĩka ũguo nĩ getha onanie ũthingu wake, tondũ wa ũrĩa mehia ma mbere ĩo maarekeirũo na gũkirĩrĩria kwa Ngai.
• 26. Agĩgĩĩka ũguo nĩ getha onanie ũthingu wake o matukũ maya tũrĩ, kũmenyeke atĩ we mwene nĩ mũthingu, na atĩ nĩwe ũtuaga mũndũ mũthingu o ũrĩa ũkoragwo ehokete Jesu.
• 27. Hakĩrĩ ũguo-rĩ, gĩtũmi gĩa twĩgoocage-rĩ, gĩkĩrĩ ha? Nĩ gĩthengie kũna. Gĩthengete nĩ ũndũ wa watho ũrĩkũ? Nĩ ũrĩa wa ciĩko? Aca, nĩ watho ũrĩa wa wĩtĩkio.
• 28. Amu ũrĩa tuonaga harĩ ũhoro ũcio nĩ atĩ mũndũ atuagwo mũthingu nĩ ũndũ wa gwĩtĩkia, ti ũndũ wa ũrĩa ekaga maũndũ marĩa maathane watho-inĩ.
• 29. Kana Ngai akĩrĩ o wa Ayahudi oiki? Githĩ ti wa andũ a Ndũrĩrĩ o nao? Ĩĩ-ni, nĩ Ngai wa andũ a Ndũrĩrĩ o nao;
• 30. kuona atĩ Ngai no ũmwe, na nĩwe ũrĩtuaga andũ arĩa maruaga athingu na njĩra ya gwĩtĩkia, nao arĩa mataruaga amatuage athingu o nao no ũndũ wa gwĩtĩkia.
• 31. Tũkiuga ũguo-rĩ, githĩ ũhoro ũcio wa wĩtĩkio nĩ gũthahia tũgũgĩthahia ũhoro wa watho naguo? Hĩ, kũroaga gũtuĩka ũguo! Ũrĩa kũrĩ, nĩ kuongerera tũkuongerera watho hinya.

Home