9. Rĩu-rĩ, kĩrathimo kĩu-rĩ, kĩarathimirũo o andũ arĩa maruaga oiki, kana andũ arĩa mataruaga nĩmaarathimirũo o nao? Amu tuugaga ũũ: Ha ũhoro wa Iburahimu, wĩtĩkio wake nĩguo aatuĩrĩirũo ta arĩ ũthingu e naguo.
10. No rĩrĩ, aatuirũo mũthingu ũguo arĩ na ũhoro ũrĩkũ? Nĩ hĩndĩ ĩrĩa aarĩkĩtie kũgwata ũhoro wa kũrua, kana nĩ hĩndĩ ĩrĩa ataagwatĩte ũhoro ũcio? Ti hĩndĩ ĩrĩa aagwatĩte ũhoro wa kũrua, nĩ rĩrĩa ataaũgwatĩte.
11.
Nake agĩcoka kũheo kĩmenyithia kĩu gĩa kũrua, gĩtuĩke rũũri rũa ũthingu ũrĩa woimanire na wĩtĩkio ũrĩa aarĩ naguo hĩndĩ ĩrĩa ataagwatĩte ũhoro wa kũrua. Gũgĩĩkwo ũguo nĩ getha atuĩke ithe wa andũ arĩa othe metĩkĩtie, o na gwatuĩka atĩ matigwatĩte ũhoro ũcio wa kũrua, nĩguo o nao matuagwo athingu;
12. na ningĩ nĩ getha atuĩke ithe wa arĩa magwatĩte ũhoro wa kũrua, na to kũgwata ũhoro ũcio wa kũrua gwiki, no nĩ kũrũmanĩrĩra marũmanagĩrĩra na wĩtĩkio ũcio ithe witũ Iburahimu aarĩ naguo rĩrĩa ataagwatĩte ũhoro ũcio wa kũrua.
13.
Nĩ gũkorũo kĩĩrĩro gĩkĩ gĩa atĩ Iburahimu agatuĩka mũgai wa kũgaĩrũo thĩ yothe, nderĩirũo we mwene, o na kana arĩa a mbeũ yake, nĩ ũndũ wa gwathĩkĩra watho, no nĩ ũndũ wa ũthingu ũrĩa uumanaga na wĩtĩkio.
15. Nĩ gũkorũo watho ũrehagĩrĩre andũ marakara, no rĩrĩ, kũrĩa gũtarĩ gũtue watho-rĩ, kwagarara watho o nakuo gũtingĩgĩa.
16. Nĩ ũndũ wa ũguo, ũthingu ũcio uumanaga na wĩtĩkio, nĩ getha wonekage no ũndũ wa Wega wa Ngai; nĩguo ũndũ ũrĩa mwĩranĩre wonekage hatarĩ nganja nĩ andũ othe a mbeũ ya Iburahimu, to arĩa maaheirũo ũhoro wa watho oiki no ningĩ arĩa o nao metĩkĩtie wĩtĩkio ta ũcio wake.
17.
Amu Iburahimu ũcio-rĩ, o ta ũrĩa ũhoro wake wandĩkĩtwo, atĩ, Nĩngũtuĩte ithe wa ndũrĩrĩ nyingĩ-rĩ, maitho-inĩ ma Ũcio etĩkĩtie nĩwe ithe witũ ithuothe, o maitho-inĩ ma Ngai, we ũriũkagia arĩa makuĩte, na aaragia ũhoro wa maũndũ marĩa matarĩ ho o ta marĩ ho.
18.
Nake Iburahimu, o na kũngĩtuĩka ũndũ ũcio erĩirũo ndũngĩĩrĩgĩrĩrĩka-rĩ, nĩaawĩtĩkirie, agĩgĩtũũra erĩgĩrĩire atĩ nĩagatuĩka ithe wa ndũrĩrĩ nyingĩ, kũringana o na ũhoro ũrĩa aaheirũo akĩĩrũo ũũ, Ũguo noguo a mbeũ yaku makaigana.
19. Na rĩrĩa eciririe ũhoro wa mwĩrĩ wake akĩmenyaga atĩ no ta ũrĩ mũkuũ (nĩ ũndũ mĩaka ĩrĩa aaikarĩte yarĩ ta mĩaka igana), ningĩ eciria ũrĩa nda ya Sara yathirĩte hinya wa gũciara-rĩ, ndaigana kũnyihanyihĩrũo nĩ wĩtĩkio:
20. no rĩrĩ, aaroragia maitho o na harĩ wĩranĩro ũcio wa Ngai, na ndathanganie nĩ kwaga wĩtĩkio; agĩkĩgĩa na hinya nĩ ũndũ wa gwĩtĩkia, na akagoocaga Ngai,
21. akĩmenyaga o mũno atĩ ũguo aamwĩrĩire o na kũũhingia ndarĩ hĩndĩ atangĩhota kũũhingia.
22. Naguo ũhoro ũcio agĩgĩtuĩrũo ta arĩ ũthingu e naguo.
23. Na rĩrĩ, ũhoro ũcio, atĩ ũguo ekire ũgĩtũma atuwo mũthingu-rĩ, ndwandĩkirũo no ũndũ wake wiki:
24. no nĩwaandĩkirũo nĩ ũndũ witũ o na ithuĩ, amu tũrĩtuagwo athingu o na ithuĩ, arĩa tũrĩkoragwo twĩhokete Ũcio wariũkirie Jesu, Mwathani witũ, oime kũrĩ arĩa akuũ,
25.
o we waneanirũo nĩ ũndũ wa mehia maitũ, na akĩriũkio nĩ getha tũtuwo athingu.