1. NĨ ũndũ ũcio-rĩ, kuona atĩ nĩtũtuĩtwo athingu nĩ ũndũ wa gwĩtĩkia-rĩ, nĩtũikarage o tuiguaine na Ngai nĩ ũndũ wa kũiguithanio nake nĩ Mwathani witũ Jesu Kristo,
2. o ũcio ningĩ watũmire twĩtĩkĩrio tũkinye Wega-inĩ wa Ngai, o harĩa tũrũngiĩ rĩu, na njĩra ĩo ya wĩtĩkio; na nĩtũkĩĩrahagĩre wĩrĩgĩrĩro ũrĩa twĩ naguo wa gũgakinyĩra riri wa Ngai.
3. Ningĩ to ũguo wiki, no rĩrĩ, o na kwĩraha nĩtwĩrahagĩre maũndũ marĩa tuonaga ma thĩna, tũkĩmenyaga atĩ kuona thĩna gũtũmaga tũgĩe na kũũmĩrĩria,
4. nakuo kũũmĩrĩria kũu gũtũmaga tũgĩe na gwĩkindĩra, naguo wĩkindĩru ũcio ũgatũma tũgĩe na wĩrĩgĩrĩro,
6. Amu-rĩ, hĩndĩ ĩrĩa twatũire twagĩte hinya-rĩ, o ihinda rĩrĩa rĩaagĩrĩire rĩakinya, Kristo nĩaakuire ithenya rĩa andũ othe matatĩaga Ngai.
7. Na rĩrĩ, nĩ hinya mũndũ etĩkĩre kũũragwo ithenya rĩa mũndũ ũngĩ, o na ũrĩa mũthingu, no hihi kwahota kuoneka mũndũ ũngĩũmĩrĩria kũũragwo o ũguo, ithenya rĩa mũndũ mwega.
8. No rĩrĩ, ũndũ ũrĩa Ngai onanĩtie ũtwendi wake naguo-rĩ, nĩ ũyũ, atĩ Kristo aatũkuĩrĩire rĩrĩa twatũire tũrĩ o ehia.
9. Na rĩu, kuona atĩ nĩtũrĩkĩtie gũtuwo athingu nĩ ũndũ wa thakame yake-rĩ, makĩria o na kũhonoka tũkahonoka kwĩ marakara ma Ngai nĩ ũndũ wake.
10. Amu-rĩ, akorũo o rĩrĩa twatũire tũrĩ thũ ciake twaiguithanirio na Ngai na njĩra ĩo ya gũkua kwa Mũriũ, rĩu tũkĩrĩ aiguithanie nake-rĩ, o makĩria tũkahonoka nĩ ũndũ wa ũguni wa muoyo wake.
11. Na to ũguo wiki, no ningĩ nĩtwĩrahaga nĩ gũkenera Ngai, nĩ ũndũ wa ũrĩa tũgunĩtwo nĩ Mwathani witũ Jesu Kristo, arĩ we ũtũmĩte rĩu tũgĩe na ũiguithanio ũcio.
13. Amu o na hĩndĩ ĩo yothe watho ũtaarĩ mũrehe-rĩ, ũhoro wa kwĩhia warĩ o gũkũ thĩ: no rĩrĩ, gũtarĩ watho, gũtirĩ mũndũ ũngĩĩrũo nĩ mwĩhia.
14. No ningĩ, gwata hĩndĩ ya Adamu o nginya hĩndĩ ya Musa, gĩkuũ-rĩ, kĩo nĩgĩatũũrire o gĩthamakagĩra andũ, o ro acio matehirie na mwĩhĩrie ta ũrĩa wa Adamu akĩagarara watho. Nake Adamu ũcio nĩ wa kũgerekanio na Ũrĩa warĩ wa gũũka thutha.
15. No rĩrĩ, ũguo ihĩtia rĩatariĩ, rĩu rĩahĩtirio, tiguo kĩheo kĩrĩa Ngai aaheanire na Wega wake kĩhaana. Nĩ ũndũ, o na gwatuĩka atĩ mũingĩ nĩ gũkua wakuire nĩ ũndũ wa ihĩtia rĩa mũndũ ũcio ũmwe-rĩ, Wega wa Ngai, o na kĩheo kĩrĩa gĩokire nĩ ũndũ wa Wega wa mũndũ ũmwe, nĩwe Jesu Kristo-rĩ, nĩcio ciaingĩhĩire mũingĩ o mũno makĩria.
16. Ningĩ kĩheo kĩu ti atĩ kĩringaine na ũhoro wa mũndũ o ũmwe wehĩtie; nĩ ũndũ-rĩ, gũtuĩrũo kwa mũndũ ũcio ũmwe gwatũmire othe matuwo oru, no rĩrĩ, kĩheo kĩu kĩaheanirũo o ũguo na wega-rĩ, kĩarutirũo nĩ ũndũ wa mahĩtia ma andũ aingĩ, na nĩ gĩa gũtũma matuwo athingu.
17. Amu-rĩ, gwagĩtuĩka atĩ tondũ wa ihĩtia rĩa mũndũ ũmwe gĩkuũ gĩgĩtũũra gĩthamakagĩra andũ o ũndũ wa mũndũ ũcio ũmwe-rĩ, andũ arĩa makinyagĩrio Wega ũcio mũingĩ mũno wa Ngai, o makĩingĩhagĩrio kĩheo kĩu gĩa ũthingu nĩwe, acio-rĩ, makĩria nĩ a gũtũũra mathamakaga marĩ atonyu muoyo-inĩ, nĩ ũndũ wa ũrĩa ũmwe, o we Jesu Kristo.
18. Gũgakĩoneka atĩrĩ, atĩ ta ũrĩa ihĩtia o rĩmwe rĩatũmire andũ othe matuĩrũo cira atĩ nĩ oru, no taguo wĩko o ũmwe wa ũthingu watũmire andũ othe matuwo athingu, nĩguo magĩe na muoyo.
19. Amu-rĩ, o ta ũrĩa kũrema kwa mũndũ ũmwe gwatũmire andũ aingĩ matuwo ehia, no taguo gwathĩka kwa ũrĩa ũmwe kũrĩtũmaga andũ aingĩ matuwo athingu.
20. Watho-rĩ, nĩwatonyire na rũere-inĩ, ũkĩrehwo nĩ getha ũhoro wa mahĩtia wongerereke; no rĩrĩ, hau ũhoro wa wĩhia wakĩongererekeire-rĩ, Wega wa Ngai naguo wacokire kũingĩhĩra andũ o mũno makĩria,
21. nĩ getha rĩrĩ, o ta ũguo ũhoro wa wĩhia watũire ũthamakaga ũgĩtũmaga andũ makue-rĩ, no taguo Wega wa Ngai ũthamakage arĩ guo, ũgĩtũmaga andũ matuwo athingu, nĩguo matũũre muoyo ũtagathira, nĩ ũndũ wa ũguni wa Jesu Kristo Mwathani witũ.