1.
NAHO ha ũhoro wa mũhothi ũrĩa ũhothagwo nĩ ũndũ wa andũ arĩa aamũre-rĩ, inyuĩ na inyuĩ ĩkagai o ta ũrĩa ndaathanire gwĩkagwo makanitha-inĩ marĩa ma Galatia.
2. Mũthenya wa kwambĩrĩria kiumia-rĩ, o mũndũ wanyu nĩaigage mũthithũ, o ta ũrĩa arathimĩtwo, nĩ getha mĩhothi ndĩgatuĩke ya kũhothwo rĩrĩa ndoka.
3. Na ndakinya kwanyu, andũ o arĩa mũgakorũo mũgathĩrĩirie na marũa-rĩ, nĩo ngatũma magatware kĩndũ kĩrĩa mũheanĩte na ũtugi Jerusalemu.
4. Na kũngĩonwo arĩ wega o na niĩ ’thiĩ, nĩngatwarana nao.
6. na hihi nĩngaikara na inyuĩ ihinda, o na kana hihi ’nine hingo yothe ya heho ndĩ o kwanyu, nĩ getha mũkanyumagaria ngĩgwata rũgendo ’thiĩ o na kũrĩa ngathiĩ.
7. Tondũ ndikwenda kuonana na inyuĩ hĩndĩ ĩno ngĩhĩtũka o ro ũguo, nĩ ũndũ ngwĩrĩgĩrĩra atĩ nĩngaikarania na inyuĩ ihinda, Mwathani etĩkĩra.
8.
No rĩrĩ, ngwamba gũikara gũkũ Efeso nginya Bendegothito,
9. nĩ gũkorũo nĩ ta kũhingũrĩrũo ’hingũrĩirũo mũrango mũnene, ngakĩona hingo ya kũruta wĩra mũno kuo, nacio thũ nĩ nyingĩ.
10.
Timotheo angĩũka-rĩ, menyererai atĩ aikare kũu kwanyu atarĩ ũndũ egwĩtigĩra, nĩ gũkorũo nĩ wĩra wa Mwathani araruta, o ta ũrĩa niĩ na niĩ ndĩũrutaga.
11. Tondũ ũcio-rĩ, mũndũ o na ũrĩkũ ndakanamũmene, no mũmuumagarie agwate rũgendo rũake na thayũ, nĩ getha akinye kũrĩ niĩ, nĩ gũkorũo nĩngũmweterera oke hamwe na ariũ a Ithe witũ arĩa angĩ.
12. No rĩrĩ, ha ũhoro wa mũrũ wa Ithe witũ Apolo-rĩ, nĩndamũringĩrĩirie mũno oke kũrĩ inyuĩ hamwe na ariũ a Ithe witũ, nowe ndaigana kwenda o na hanini gũũka rĩu, no nĩagoka rĩrĩa arĩona hĩndĩ njagĩrĩru.
13. Ikaragai mwĩhũgĩte, na mwĩhande mũrũmĩte wega ũhoro-inĩ wa gwĩtĩkia; ningĩ mũtuĩkage ta arũme ma, na mũgĩte o kũgĩa na hinya.
14. Na maũndũ mothe marĩa mwĩkaga-rĩ, mekagei o na wendani.
15.
Ningĩ rĩrĩ, ariũ a Ithe witũ, kũrĩ ũndũ ngũmũthaitha nĩ ũndũ waguo: nĩmũũĩ andũ a nyũmba ya Stefana, atĩ nĩo maciaro ma mbere ma bũrũri wa Akaia, na atĩ nĩmetuĩte a gũtungatagĩra andũ arĩa aamũre;
16. ndamũthaitha mwathĩkage nĩ andũ ta acio, o na mũndũ o wothe ũrĩa ũrutaga wĩra hamwe na ithuĩ akĩũnogagĩra.
17. Na rĩrĩ, nĩ gũkena ngenete nĩ ũndũ wa ũrĩa Stefana marĩ na Foritunato na Akaiko mokĩte; nĩ ũndũ nĩo maa’hingĩirie ũhoro wanyu ũrĩa itaarĩ naguo.
18. Amu nĩ gũcanjamũra maacanjamũrire roho wakwa, na magacanjamũra maroho manyu o namo; tondũ ũcio-rĩ, kĩheagei andũ ta acio gĩtĩo.
19.
Makanitha ma gũkũ Asia nĩmaamũgeithia. Akula na Pirisila nĩmaamũgeithia mũno thĩinĩ wa Mwathani, me na andũ a kanitha arĩa macemanagia nyũmba-inĩ yao.
20. Nĩmwageithio nĩ ariũ a Ithe witũ othe. Geithaniai inyuene, o mũndũ akĩgeithie ũrĩa ũngĩ na ngeithi theru ya kũmumunyana.
21. Ngeithi ici ndaciandĩka na guoko gwakwa mwene, niĩ Paulo.