1. NIĨ na niĩ, ariũ a Ithe witũ-rĩ, hĩndĩ ĩrĩa ndokire kũrĩ inyuĩ, ndiokire ngĩmũhunjĩria ũhoro wa hitho ũrĩa wa Ngai na kanua kega kana ũũgĩ mũnene.
2. Nĩ gũkorũo nĩndoigĩte ndirĩ ũndũ ngũmenya ndĩ kwanyu, tiga o ũhoro wa Jesu Kristo na wa ũrĩa aambirũo mũtĩ igũrũ.
3.
Na ndaikaraga na inyuĩ ndĩ mũndũ mwagu hinya, na ndĩ o na guoya, na moyoyo maingĩ.
4. Naguo mwarĩrie wakwa o na ũhoro ũcio ndahunjagia, matiarĩ ma ciugo cia kũgucanĩrĩria na ũũgĩ; no maarĩ ma kuonania Roho, o na kuonania hinya;
5. nĩ getha wĩtĩkio wanyu ndũgakorũo ũtiirĩrĩirũo nĩ ũũgĩ wa andũ, tiga o hinya wa Ngai.
6. No rĩrĩa twĩ na andũ agima-rĩ, nĩ ũhoro wa ũũgĩ twaragia, ĩndĩ, ũcio nĩ ũũgĩ ũtarĩ wa mahinda maya ma ndũire, na ũtarĩ wa anene a mahinda maya o arĩa makiriĩ kũrindũrũo.
7. No nĩ ũũgĩ wa Ngai tũheanaga ũhoro waguo, ũrĩa wa hitho, o ũrĩa waikarĩte ũhumbĩkĩte, naguo nĩ ũrĩa Ngai orereire o mbere ya mĩndĩ na mĩndĩ ũrĩ wa gũgatũma ithuĩ tũgĩe na riri.
8. Naguo ũũgĩ ũcio, anene a mahinda maya ma ndũire gũtirĩ ũũũĩ, amu mangĩaũmenyete matingĩaambire Mwathani mwene-riri mũtĩ igũrũ.
9.
No rĩrĩ, nĩ ta ũrĩa haandĩkĩtwo atĩrĩ,
Maũndũ matarĩ monwo na maitho, na matarĩ maaiguwo na matũ,
O na matarĩ maatonya ngoro ya mũndũ,
Nĩmo Ngai aathondekeire andũ arĩa mamwenda.
10. No ithuĩ-rĩ, Ngai nĩatũguũrĩirie maũndũ macio na njĩra ya Roho; nĩ gũkorũo Roho nĩathuuthuuragia maũndũ mothe, o gwata maũndũ ma Ngai marĩa ma thĩinĩ matangĩkinyĩrĩka.
11. Amu, ha andũ-rĩ, nũ ũngĩmenya meciria ma mũndũ, tiga o roho wa mũndũ ũcio we mwene, ũrĩa ũrĩ thĩinĩ wake? Namo meciria ma Ngai, o ũndũ ũmwe, gũtirĩ ũngĩmamenya tiga o Roho wa Ngai.
12. Na ithuĩ-rĩ, roho ũrĩa twaheirũo ti ũrĩa wa gũkũ thĩ; ithuĩ twaheirũo roho ũrĩa uumaga kũrĩ Ngai, nĩ getha tũhotage kũmenya maũndũ marĩa Ngai atũtugĩte namo.
13. Namo maũndũ macio nĩmo tũheanaga ũhoro wamo, no tũtimaaragia na ciugo iria tũrutĩtwo nĩ ũũgĩ wa andũ, tiga o iria tũrutagwo nĩ Roho; tũgagĩtaũraga maũndũ ma kĩĩroho na ndeto o cia kĩĩroho.
14. Amu mũndũ wa mĩĩcirĩrie o ĩrĩa ya mũciarĩre-rĩ, ndetĩkagĩra maũndũ ma Roho wa Ngai, nĩ ũndũ onaga ta marĩ ma ũrimũ, na ndangĩhota kũmamenya, nĩ gũkorũo makũũrĩkanaga na njĩra ya kĩĩroho.
15. No rĩrĩ, mũndũ wa mĩĩcirĩrie ya kĩĩroho nĩahotaga gũkũũrana maũndũ mothe, no we mwene ndangĩtuĩrĩka nĩ mũndũ.
16.
Tondũ atĩrĩ, Nĩ mũndũ ũrĩkũ wanamenya meciria ma Mwathani, nĩguo ahote kũmũtaara? No ithuĩ-rĩ, tũrĩ na meciria ma Kristo.