1. NA niĩ-rĩ, ariũ a Ithe witũ, ndiahotaga kwaria na inyuĩ ta mũrĩ a mĩĩcirĩrie ya kĩĩroho; ndamwaragĩria ta mũrĩ a mĩĩcirĩrie ya kĩĩmwĩrĩ, ta mũrĩ o twana tũnini ũhoro-inĩ wa Kristo.
2. Nĩ iria ndamũkundagia, ti irio cia ndanuko ndamũheaga, nĩ ũndũ hĩndĩ ĩo mũtingĩahotire gũcirĩa. O na rĩu mũtirĩ mũratuĩka a gũcihota,
3. amu mũtũire mũrĩ o a mĩĩcirĩrie ĩo ya kĩĩmwĩrĩ; amu kuona atĩ thĩinĩ wanyu kũrĩ na maũndũ ma ũiru o na mahiũrania-rĩ, githĩ o na rĩu mũtikĩrĩ andũ a mĩĩcirĩrie ya kĩĩmwĩrĩ, nayo mĩthiĩre yanyu to ta ya andũ o ũguo?
4. Nĩ ũndũ rĩrĩa mũndũ ũmwe ekuuga, Niĩ ndĩ wa Paulo; na ũngĩ akoiga, Niĩ ndĩ wa Apolo-rĩ, githĩ mũtikoragwo mũrĩ andũ o ũguo?
5. Kaĩ Apolo arĩ ũ? Na Paulo nũ? Acio no ndungata iria ciatũmire mwĩtĩkie, o mũndũ agakĩruta wĩra ũrĩa Mwathani aamũgaĩire.
7. Hakĩrĩ ũguo-rĩ, ũrĩa mũhandi ndarĩ bata, o na kana mũitĩrĩria-maĩ, tiga o Ngai ũrĩ bata, o we ũkũragia.
8. Na rĩrĩ, mũhandi na mũitĩrĩria-maĩ-rĩ, acio no amwe, no erĩ gũtirĩ ũtakaheo ũtungati wake mwene kũringana na wĩra wĩ mĩnoga ũrĩa we mwene arutĩte.
9. Amu-rĩ, ithuĩ tũrĩ arutithania wĩra hamwe na Ngai; nĩ inyuĩ mũgũnda wa Ngai, nĩ inyuĩ mwako wa Ngai.
10. Niĩ-rĩ, tondũ wa Wega ũrĩa ndakinyĩirio nĩ Ngai, nĩ gwaka ndaakire gĩtina, ta ndĩ mwakithia-wa-nyũmba ũrĩa mũũgĩ, na mũndũ ũngĩ agacoka agaaka igũrũ rĩakĩo. No rĩrĩ, mũndũ o mũndũ nĩamenyagĩrĩre ũrĩa egwaka igũrũ rĩakĩo.
11. Tondũ gũtirĩ mũndũ ũngĩhota gwaka gĩtina kĩngĩ tiga o kĩu kĩrĩkĩtie gwakwo, na nĩkĩo Jesu Kristo.
12. Na rĩrĩ, mũndũ angĩaka igũrũ rĩa gĩtina kĩu na thahabu, kana betha, kana mahiga marĩ goro, o na kana mĩtĩ, kana nyeki, kana itira cia rũũa-rĩ,
13. gũtirĩ hĩndĩ wĩra wa mũndũ o mũndũ ũtakoneka ũrĩa ũtariĩ; nĩ ũndũ Mũthenya ũrĩa nĩguo ũgatũma uumbũke, nĩ gũkorũo mũthenya ũcio ũgakĩa o na mwaki, naguo mwaki ũcio nĩguo ũkageria wĩra wa mũndũ o mũndũ ũtũme ũmenyeke mũthemba waguo.
14. Na rĩrĩ, wĩra wa mũndũ, ũrĩa arutĩte wa gwaka igũrũ rĩa gĩtina kĩu, ũngĩikara ũrũmĩte-rĩ, mũndũ ũcio nĩakaheo ũtungati.
15. Na wĩra wa mũndũ ũngĩhĩa-rĩ, nĩ kũũrũo akorũo nĩguo; nowe mwene nĩakahonoka, ĩndĩ, akahonokio o ta mũndũ ũhungurĩirio mwaki-inĩ.
16.
Kaĩ mũtoĩ nĩ inyuĩ hekarũ ya Ngai, na atĩ Roho wa Ngai nĩwe ũtũũraga thĩinĩ wanyu?
17. Mũndũ angĩkorũo nĩaronũha hekarũ ya Ngai-rĩ, ũcio no onũhwo nĩ Ngai; nĩ ũndũ hekarũ ya Ngai nĩ nyamũre, nayo hekarũ ĩo nĩyo inyuĩ.
18. Mũndũ o wothe ndakanae kwĩhenia. Mũndũ o na ũrĩkũ wanyu angĩkorũo nĩeonaga ta e mũũgĩ na ũũgĩ wa mahinda maya tũrĩ-rĩ, ũcio nĩetĩkĩre gũtuĩka kĩrimũ, nĩ getha acoke ohĩge.
19.
Tondũ ũũgĩ wa gũkũ thĩ no ũrimũ harĩ Ngai. Amu nĩ haandĩke atĩrĩ, Nĩwe ũgwatagia andũ arĩa ogĩ na wara wao ene;
20. o na ningĩ atĩrĩ, Mwathani nĩoĩ macũranio ma andũ arĩa ogĩ, atĩ nĩ ma tũhũ.
21. Hakĩrĩ ũguo-rĩ, mũndũ o na ũrĩkũ ndakanerahe na ũhoro wa andũ. Nĩ gũkorũo maũndũ mothe no manyu;
22. angĩkorũo nĩ Paulo, kana Apolo, kana Kefa, kana thĩ ĩno, kana gũtũũra muoyo, kana gũkua, kana maũndũ marĩa marĩ kuo rĩu, kana marĩa magoka, macio mothe no manyu;
23. na inyuĩ mũrĩ a Kristo, nake Kristo nĩ wa Ngai.