1. TONDŨ rĩrĩ, nĩtũũĩ atĩ nyũmba iitũ ya gũkũ thĩ, ĩno tũikaraga thĩinĩ wayo ta hema, ĩngĩtharũrio-rĩ, tũrĩ na nyũmba ĩngĩ tũheetwo nĩ Ngai, nyũmba ĩtaakĩtwo nĩ moko ma andũ, ya gũtũũra tene na tene, nayo nĩ ya kũu matu-inĩ.
2. O na rĩu tũikarĩte ĩno tũrĩ, nĩ gũcaya tũcayaga tũkĩĩriragĩria kũhumbĩrũo igũrũ rĩayo na gĩtũũro kĩu kiumaga matu-inĩ,
4. Amu ti-therũ ithuĩ tũtũire hema ĩno tũcayaga nĩ ũndũ wa kũritũhĩrũo nĩ maũndũ mayo; na ti atĩ nĩ kwenda tũkwenda kwaũrũo hema ĩo, ta arĩ nguo tũrutĩtwo, no nĩ kwenda tũkwenda twĩkĩrũo nyũmba ĩo ĩngĩ igũrũ rĩayo, nĩ getha mwĩrĩ ũyũ wa gũkua ũmerio nĩ ũhoro wa muoyo.
5. Na rĩrĩ, ũrĩa watũthagathagire nĩ ũndũ wa ũhoro ũcio kĩũmbe nĩ Ngai, nake nĩaatũheire Roho wake atuĩke o mũtũrio waguo.
6. Tondũ ũcio-rĩ, tũikaraga hingo ciothe twĩting’ũrĩtie, tũkĩmenyaga atĩ hĩndĩ ĩno tũtũũraga thĩinĩ wa mwĩrĩ ta arĩ guo mũciĩ witũ, tũikaraga tũtarĩ hamwe na Mwathani,
7. (nĩ gũkorũo mĩthiĩre-inĩ iitũ tũthiaga na ũhoro wa gwĩtĩkia, ti ũhoro wa kuona na maitho).
8. Nguuga rĩngĩ atĩ tũtũũraga twĩting’ũrĩtie, na ũrĩa tũngĩenda makĩria nĩ kaba gũikara tũtarĩ thĩinĩ wa mwĩrĩ, nĩguo tũtũũranie na Mwathani ta arĩ kuo gwitũ.
9. Na tondũ ũcio ningĩ tũgeragia na kĩyo gũtũma akenage nĩ ũndũ witũ, o na twakorũo tũrĩ o gũkũ mĩĩrĩ-inĩ iitũ, o na kana tũkoretwo tũthamĩte kuo.
10.
Tondũ-rĩ, no mũhaka ithuothe tũkoneka ũrĩa tũtariĩ tũrĩ mbere ya gĩtĩ gĩa Kristo kĩrĩa gĩa ituĩro, nĩ getha o mũndũ akaheo kĩrĩa aagĩrĩirũo nĩ kũheo nĩ ũndũ wa maũndũ marĩa aaneka arĩ na mwĩrĩ, maakorũo marĩ mega kana marĩ moru.
11. Gwagĩtuĩka ũguo-rĩ, tondũ nĩtũũĩ ũrĩa Ngai aagĩrĩirũo nĩ gwĩtigĩrũo, nĩkĩo tũgeragia kũgucĩrĩria andũ; naguo ũhoro witũ wa ũrĩa tũtariĩ nĩũmenyekete nĩ Ngai, na ngwĩhoka atĩ hihi no ũmenyekaga nĩ inyuĩ o na inyuĩ ngoro-inĩ cianyu.
12. Hau naho ti kwĩgathĩrĩria tũracoka kwĩgathĩrĩria harĩ inyuĩ, no nĩ ta tũramuonia ũndũ ũrĩa ũngĩtũma mwĩrahe nĩ ũndũ witũ, nĩguo mũgĩe na ũndũ wa kũhoota andũ arĩa merahaga nĩ ũndũ wa maũndũ marĩa monagwo na maitho, na ti ũndũ wa ũrĩa ngoro ya mũndũ ĩtariĩ.
13. Amu-rĩ, tũngĩkorũo nĩ kũgũrũka tũgũrũkĩte-rĩ, tũgũrũkĩte nĩ ũndũ wa wĩra wa Ngai; na tũngĩkorũo tũhoreire meciria, tũhoreire nĩ ũndũ wanyu.
15. Ningĩ atĩrĩ, aakuire ithenya rĩa andũ othe, nĩ getha arĩa matũũraga muoyo matigacoke gũtũũra nĩ ũndũ wa bata wao ene, no matũũre nĩ ũndũ wa bata wa ũcio wakuire ithenya rĩao, agĩcoka akĩriũka.
16. Hakĩrĩ ũguo-rĩ, kuuma rĩu tũticoka gũtarania ũhoro wa mũndũ na njĩra ya ũmwĩrĩ: o na gwagĩtuĩka kwĩ hingo twataranagia ũhoro wa Kristo na njĩra ya ũmwĩrĩ-rĩ, rĩu tũtigĩte gũtarania ũhoro wake na njĩra ĩo.
17. Tondũ ũcio-rĩ, mũndũ angĩkorũo arĩ thĩinĩ wa Kristo-rĩ, nĩagarũrũkĩte agatuĩka mũndũ ũngĩ mwerũ: maũndũ marĩa ma tene nĩmathirĩte; nĩ atĩrĩ, nĩmatuĩkĩte mangĩ merũ.
18. Namo maũndũ mothe moimaga kũrĩ Ngai, o we watũiguithanirie nake we mwene thĩinĩ wa Kristo, na agĩtũtua ndungata cia gũtungatĩra ũhoro ũcio wa ũiguithanio;
19. nĩguo wa atĩ Ngai aarĩ thĩinĩ wa Kristo, agaikara akĩĩiguithanagĩria kĩrĩndĩ gĩa thĩ nake we mwene, agĩtigaga gũtarĩra andũ mahĩtia mao, na atĩ ũhoro ũcio wa ũiguithanio nĩaũigĩte kũrĩ ithuĩ tũũheanage.
20. Tondũ wa ũguo, tũkĩrĩ arekio mareketio a kwarĩrĩria Kristo, o ta arĩ Ngai ũrathaithana na tũnua twitũ; twamũthaitha ithenya rĩa Kristo atĩrĩ: ĩtĩkĩrai kũiguithanio na Ngai.
21. Ngai nĩaatũmire ũcio ũtarĩ hingo aamenyire wĩhia atuĩke o wĩhia arĩ we ithenya riitũ, nĩ getha ithuĩ, nĩ ũndũ wa ũrĩa twĩ thĩinĩ wake, tũtuĩke o ũthingu wa Ngai.