1. Na rĩrĩ, endwa akwa, tondũ nĩtwĩrĩirũo maũndũ macio, nĩtwĩtheragiei tũtiganage na ũndũ o wothe ũrĩa ũthũkagia mũndũ mwĩrĩ o na kana roho, tũkĩhingagie ũhoro witũ wa gũtuĩka atheru, o tũgĩĩtigagĩra Ngai.
2. Atĩrĩrĩi, twĩtĩkĩriei ngoro-inĩ cianyu: gũtirĩ mũndũ o na ũmwe tũrĩ tweka ũũru, kana tũkĩmũthũkia, kana tũkĩmũtwarĩrĩria.
3. Ndikuuga ũguo ngĩenda kũmũtua ehia, amu nĩndĩkĩtie kuuga rĩngĩ atĩ mũtũire o thĩinĩ wa ngoro ciitũ, tũkuanĩre hamwe, o na kana tũtũũranie muoyo.
4. Kwaria ndĩmwaragĩria ndĩ na ũũmĩrĩru mũnene, o na kwĩraha ndĩĩrahaga mũno nĩ ũndũ wanyu; nĩnjanjamũkĩte mũno, na ngagĩa na gĩkeno gĩkĩrĩrĩirie mathĩna-inĩ mothe marĩa tuonaga.
5.
Nĩ gũkorũo o na hĩndĩ ĩrĩa twakinyire Makedonia, tũtiigana kuona ũhurũko wa mwĩrĩ, no gũthĩnio twathinagio na mĩena yothe. Twarigicĩirio nĩ mahiũrania, nakuo ngoro-inĩ thĩinĩ tũgaikaraga twĩ na guoya.
6. No rĩrĩ, ũrĩa ũũmagĩrĩria arĩa mainamĩte ngoro, nĩwe Ngai-rĩ, we nĩaatũũmĩrĩirie nĩ ũndũ wa ũrĩa Tito okire;
7. na to ũndũ wa gũũka gwake gwiki, no ningĩ nĩ ũndũ wa kũũmĩrĩrio kũrĩa omĩrĩirio nĩ inyuĩ, hĩndĩ ĩrĩa aatũheaga ũhoro wa ũrĩa mwĩ na mĩĩto ya kũnyona, na ũrĩa mũtũire mũcakayaga, o na ũrĩa mũrĩ na kĩyo gĩa kũndeithĩrĩria; na tondũ wa ũhoro ũcio wake ningĩ ngĩkĩria gũkena mũno.
8. Amu-rĩ, o na ingĩkorũo nĩndamũiguithirie kĩeha na marũa makwa, ndikwĩrira, o na kũngĩtuĩka atĩ kwĩ hĩndĩ nderirĩte. Amu nguona atĩ marũa macio nĩmaamũiguithirie kĩeha, o na arĩ o kahinda kanini.
9. No rĩu nĩ gũkena ngenete, na ti tondũ wa ũrĩa mwaiguithirio kĩeha, no tondũ kĩeha kĩu mwaiguithirio nĩgĩatũmire mũhere; tondũ-rĩ, mwaiguithirio kĩeha o ta ũrĩa Ngai endaga, nĩ getha mũtigakĩũrũo nĩ ũndũ o na ũmwe nĩ ũndũ witũ.
10. Nĩ gũkorũo kĩeha kĩrĩa kiumaga kũrĩ Ngai kĩrehage ũhoro wa kũhera, ũrĩa wa gũtũma mũndũ ahonoke, naguo nĩ ũrĩa ũtacokaga kwĩrirũo; no rĩrĩ, kĩeha kĩrĩa kiumaga maũndũ-inĩ ma gũkũ thĩ kĩrehage gĩkuũ.
11. Nĩ ũndũ atĩrĩ, ũhoro o ro ũcio wanyu wa kũiguithio kĩeha ta ũrĩa Ngai endaga-rĩ, kaĩ nĩũkĩmwĩkĩrĩte kĩyo kĩnene-ĩ! O na kwenda kũnene gwa gwĩkũũra-ĩ! O na gwakanwo mũno nĩ ngoro-ĩ! O na ningĩ kĩmako-ĩ! O na kwĩĩndirĩria-ĩ! Na kwĩgũmĩra kũnene-ĩ! O na kwenda kũnene gwa kũrĩhanĩria-ĩ! Ũhoro-inĩ ũcio wothe-rĩ, nimwĩonanĩtie atĩ mũtirĩ na ũndũ mũngĩcukĩrũo.
12. Hakĩrĩ ũguo-rĩ, o na gwatuĩka nĩndamwandĩkĩire marũa-rĩ, ndiamaandĩkire nĩ ũndũ wa mũndũ ũcio wehĩtie, o na kana ũndũ wa ũcio ũngĩ wehĩtie; ndamaandĩkire no getha kĩyo kĩanyu gĩa kũrũmbũiya ũhoro witũ kĩmenyeke nĩ inyuĩ inyuene mbere-inĩ ya Ngai.
13. Tondũ ũcio-rĩ, nĩtwanyamarũrũkire; na hamwe na kũnyamarũrũka ũguo tũkĩongererũo gĩkeno makĩria nĩ ũndũ wa ũrĩa Tito nake aakenete, nĩ ũndũ ngoro yake nĩyacanjamũrĩtwo nĩ inyuĩ inyuothe.
14. Amu ingĩkorũo ndĩ na ũndũ nderahĩire harĩ we nĩ ũndũ wanyu-rĩ, ndiigana gũconorithio nĩ ũndũ ũcio; no rĩrĩ, o ta ũrĩa maũndũ mothe marĩa twamwĩraga maarĩ ma ma, no taguo kwĩraha kũu nderahire nakuo harĩ Tito gwatuĩkire atĩ no ũhoro-wa-ma o nakuo.
15. Nake aaririkana ũrĩa mwaathĩkire inyuothe, o na ũrĩa mwamwĩtĩkĩrire o mũkĩmwĩtigagĩra na mũkĩinainaga-rĩ, nĩaiguaga akĩmwenda o mũno makĩria na ngoro yake.
16. O na niĩ-rĩ, gũkena nĩngenete nĩ ũndũ ndahota gwĩting’ũria nĩ ũndũ wanyu maũndũ-inĩ mothe.