1. Ici nĩcio irĩra cia watho wa kũrũmĩrĩrũo, o na matuĩro ma cira, marĩa mũrĩmenyagĩrĩra mũmekage mwĩ bũrũri ũrĩa Jehova, Ngai wa maithe manyu, amũheete mũwĩgwatĩre ũtuĩke wanyu, matukũ mothe marĩa mũgũtũũra gũkũ thĩ.
2. No mũhaka mũkaananga kũndũ guothe kũrĩa ndũrĩrĩ iria mũkegwatĩra bũrũri wacio itungatagĩra ngai ciacio igĩcihoya, o na kũngĩtuĩka nĩ irĩma-inĩ iria ndaya mĩno, kana ithũngũri-inĩ, kana mũtĩ-inĩ ũrĩa wothe mũruru;
3. o nacio igongona ciacio mũciunange mũcigũithie thĩ, nacio itugĩ ciacio cia kũhoyũo mũciunange tũcunjĩ, o namo Maashera ma cio mũmacine na mwaki, ningĩ mĩhianano ya gwacũhio ya ngai ciacio mũmĩtemenge ĩgũe o namo marĩĩtwa ma cio mũmahuure mehere kũndũ kũu.
4. Na mũtikanahoe Jehova Ngai wanyu ũguo.
5. No rĩrĩ, handũ harĩa Jehova Ngai wanyu agathura thĩinĩ wa mĩhĩrĩga yanyu yothe, atĩ nĩguo haamũrĩrũo rĩĩtwa rĩake, naguo ũguo nĩ ta kuuga handũ harĩa agaikaraga-rĩ, hau nĩho mũrĩũnganaga, na noho mũrĩthiaga;
6. ningĩ noho mũrĩtwaraga indo cianyu iria mũrĩrutaga cia mahaki ma njino, na magongona marĩa mangĩ manyu, na gĩcunjĩ kĩanyu gĩa ikũmi, na indo cianyu cia magongona ma kũiyũkio na igũrũ na moko manyu, na indo iria mũrĩrutaga cia mĩĩhĩtwa yanyu, o na indo iria mũrĩrutaga na kwĩendera, o na marigithathi ma ndũru cianyu cia ng’ombe, na cia mbũri.
7. Naho handũ hau nĩho mũrĩrĩagĩra indo iria irĩagĩrũo mbere ya Jehova Ngai wanyu, inyuĩ inyuene o na andũ a nyũmba cianyu, mũkenagĩre maũndũ mothe marĩa mwĩkaga na moko manyu, o marĩa Jehova Ngai wanyu amũrathimĩire.
8. Na rĩrĩ, mũtikaneke maũndũ mothe marĩa tũreka twĩ gũkũ ũmũthĩ, atĩ andũ othe, mũndũ o mũndũ, eke o ta ũrĩa we mwene ekuona kwagĩrĩire,
10. No rĩrĩ, hĩndĩ ĩrĩa mũkaringa Jorodani, na mũtũũre bũrũri ũrĩa Jehova Ngai wanyu egũtũma mũũgae, na amũhe thayũ, ita cia thũ cianyu iria imũrigicĩirie mĩena yothe ithire, na mũkorũo mũtũũrĩte o wega, mũtarĩ na ũndũ o na ũmwe wa ũgwati,
11. nĩgũgakinya atĩrĩ, atĩ handũ harĩa Jehova Ngai wanyu agathura haamũrũo ha gũtũũria rĩĩtwa rĩake, hau nĩho mũgatwaraga indo ciothe iria ngũmwatha mũtwarage; nacio nĩcio mahaki manyu ma njino, na magongona manyu, na gĩcunjĩ kĩanyu gĩa ikũmi, na indo cianyu iria mũkarutaga cia magongona ma kũiyũkio na igũrũ na moko manyu, o na indo ciothe iria mũkarutaga cia mĩĩhĩtwa ĩrĩa mwĩhĩtĩte he Jehova;
12. na mũkenage mwĩ mbere ya Jehova Ngai wanyu, inyuĩ ene, na ariũ anyu, na airĩtu anyu, na ndungata cianyu cia arũme o na cia airĩtu, na Mũlawii ũrĩa ũtũũraga kwanyu mũciĩ, nĩ ũndũ wa ũrĩa ataagwatire gĩcunjĩ gĩa gĩthaka kana igai hamwe na inyuĩ.
13. Wĩmenyerere ndũkanarutĩre mahaki maku ma njino o handũ harĩa ũrĩkinyĩra;
14. no rĩrĩ, nĩũkarutagĩra indo ciaku cia mahaki ma njino o handũ harĩa Jehova agathura mũhĩrĩga-inĩ ũmwe wa mĩhĩrĩga yanyu; na hau nĩho ũgekagĩra maũndũ marĩa ngwathĩte.
15. No rĩrĩ, o na kũngĩtuĩka nĩ ũguo, ngoro yaku ĩngĩĩrirĩria nyama, wahota gũthĩnjĩra nyamũ ciaku matũũra-inĩ maku mothe, na ũrĩĩre nyama ciacio kuo, o ta ũrĩa kĩrathimo gĩtariĩ kĩrĩa Jehova Ngai waku akũrathimĩte; nao andũ arĩa me na thahu, o na arĩa matarĩ thahu, maahota kũrĩa nyama icio, o ta ũrĩa mangĩrĩa nyama cia thwariga, kana cia thiya.
16. Ũndũ mũtageka-rĩ, no kũrĩa thakame yacio; nĩ gũita mũrĩmĩitaga thĩ, o ta ũrĩa maĩ maitagwo.
17. No rĩrĩ, gĩcunjĩ gĩa ikũmi kĩa irio ciaku kĩrĩa kĩamũrĩirũo Jehova ndũkanakĩrĩĩre gwaku mũciĩ, kana gĩcunjĩ kĩu kĩa ndibei yaku, kana kĩa maguta maku, ningĩ ndũkanarĩĩre kuo marigithathi ma ndũru ciaku cia ng’ombe, na cia mbũri, kana indo iria ũrĩrutaga cia mĩĩhĩtwa yaku ĩrĩa wĩhĩtĩte, kana indo ciaku cia magongona iria ũrĩrutaga na kwĩendera, kana indo iria ũrĩrutaga cia magongona ma kũiyũkio na igũrũ na moko maku;
18. indo icio-rĩ, ũrĩcirĩagĩra mbere ya Jehova Ngai waku, o handũ harĩa Jehova Ngai waku agathura, wee mwene, na ariũ aku, na airĩtu aku, na ndungata yaku ya mũndũ mũrũme, na ndungata yaku ya mũirĩtu, o na Mũlawii ũrĩa ũrĩ gwaku mũciĩ; na ũkenagĩre mbere ya Jehova Ngai waku maũndũ-inĩ mothe marĩa wĩkaga na moko maku.
20. Na rĩrĩ, hĩndĩ ĩrĩa Jehova Ngai waku agakũneneheria mĩhaka ya bũrũri waku, o ta ũrĩa aakwĩrire atĩ nĩageka, nawe ũkiuge atĩrĩ, Nĩngũrĩa nyama, tondũ ngoro yaku nĩyendete kũmĩrĩa-rĩ, wahota kũrĩa nyama o ta ũrĩa ngoro yaku ĩkũigua ĩkĩenda.
21. Na rĩrĩ, ũngĩkona handũ harĩa Jehova Ngai waku athurĩte haamũrĩrũo rĩĩtwa rĩake hakũraihĩrĩire-rĩ, nĩũgathĩnja nyamũ iria ũkwenda cia rũũru rũaku rũa ng’ombe, kana rũa mbũri ciaku, iria ũheetwo nĩ Jehova, o ta ũrĩa ngwathĩte, na ũcirĩĩre o kũu gwaku mũciĩ, o ta ũrĩa ngoro yaku ĩkũigua ĩkĩenda.
22. Nyamũ icio-rĩ, nĩũgacirĩa o ta ũrĩa nyama cia thwariga na cia thiya irĩagwo; nao andũ arĩa me na thahu, na arĩa matarĩ na thahu, maahota kũrĩa nyama icio ithĩnjĩtwo, o ũndũ ũmwe.
23. Ũndũ ũkũmenyerera-rĩ, no atĩ ndũkanarĩe thakame yacio; nĩ gũkorũo thakame nĩyo nyene muoyo; tigaga kũrĩanĩria muoyo hamwe na nyama.
24. Ndũkanamĩrĩe; mĩitage thĩ, o ta ũrĩa maĩ maitagwo.