Go Back

Gũcokerithia Maathani Chapter 19

• 1. Na rĩrĩ, hĩndĩ ĩrĩa Jehova Ngai waku akanina ndũrĩrĩ iria Jehova Ngai waku akũheaga mabũrũri ma cio, nawe ũgakorũo ũcokete handũ hacio, ũgatũũra matũũra-inĩ ma cio, o na nyũmba ciacio-rĩ,
• 2. nĩũkaamũra matũũra matatũ kũu bũrũri ũcio Jehova Ngai waku akũheaga ũwĩgwatĩre ũtuĩke waku;
• 3. na ũgetemera njĩra cia gĩtwari; nacio ithaka cia bũrũri waku, ũcio Jehova Ngai waku atuĩte igai rĩaku, ũciatũre icunjĩ ithatũ, nĩ getha andũ othe, mũndũ o mũndũ ũrĩa ũũraganĩte, orĩre kuo.
• 4. Narĩo ituĩro rĩa mũndũ ũrĩa ũũraganĩte na akorĩra kuo ahonoke, nĩ rĩrĩ, nĩ atĩ mũndũ o wothe ũrĩa ũũragĩte mũndũ ũrĩa ũngĩ atacirĩire gwĩka ũndũ ũcio, na akorũo ndaamũthũũrĩte mbere ya hĩndĩ ĩo,
• 5. ta hĩndĩ ĩrĩa mũndũ angĩtonya kĩrĩti hihi marĩ na mũndũ ũngĩ magateme mĩtĩ, nake rĩrĩa anyitĩte ithanwa na guoko aũteme, ithanwa rĩrũke mũtĩ-inĩ warĩo, rĩkinyĩre mũndũ ũcio ũngĩ rĩmũgũthe, nake akue, mũndũ ũcio nĩorĩre itũũra rĩmwe rĩa matũũra macio, ahonoke;
• 6. nĩ getha mwĩrĩhĩria wa thakame ĩrĩa ĩitĩtwo ndakarũmĩrĩre ũcio ũũraganĩte hĩndĩ ĩrĩa ngoro yake ĩĩyũrĩtwo nĩ marakara, nake amũnyite, nĩ ũndũ wa ũrĩa njĩra ĩraihĩte, amũringe amũũrage, o na aatuĩka ndaagĩrĩirũo nĩ kũũragwo, nĩ ũndũ ndaathũũrĩte mũndũ ũcio mbere ĩo.
• 7. Tondũ ũcio, nĩndagwatha, ndakwĩra atĩrĩ, Wĩamũrĩre matũũra matatũ.
• 8. Na kũngĩkorũo Jehova Ngai waku nĩagakũneneheria mĩhaka ya bũrũri waku, o ta ũrĩa erĩire mathoguo na mwĩhĩtwa atĩ nĩageka, o na akũhe bũrũri wothe ũrĩa erĩire mathoguo atĩ nĩakamahe,
• 9. nĩ ũndũ wa ũrĩa ũgakorũo ũmenyereire maathani maya mothe ngũgwatha wĩkage mũthenya wa ũmũthĩ, atĩ wendage Jehova Ngai waku, na ũtũũre hĩndĩ ciothe ũthiaga na njĩra ciake-rĩ, nĩũkeyongerera matũũra mangĩ matatũ makĩria ma macio matatũ ma mbere;
• 10. nĩ getha thakame ya mũndũ ũrĩa ũtarĩ na ũũru ndĩkanaitwo kũu bũrũri waku, ũcio Jehova Ngai waku akũheete ũtuĩke igai rĩaku, na tondũ wa ũhoro ũcio ũcokererũo nĩ thakame ĩo.
• 11. No rĩrĩ, mũndũ o na ũrĩkũ angĩkorũo nĩathũũrĩte mũndũ ũrĩa ũngĩ, nake amuoherie handũ njĩra-inĩ amũũkĩrĩre, amũgũthe igũtha rĩa gĩkuũ nake akue, na thutha wa ũguo mũndũ ũcio mũgũthani orĩre ĩtũũra rĩmwe rĩa matũũra macio-rĩ,
• 12. athuri a itũũra rĩao nĩmarekie andũ mamũgĩre mamũrute kuo, nao macoke mamũneane moko-inĩ ma mũndũ ũcio mwĩrĩhĩria wa thakame, nĩguo oragwo.
• 13. Maitho maku maamuona-rĩ, ndũkanamũiguĩre tha no rĩrĩ, ũhoro wa gũita thakame ĩrĩa ĩtarĩ na ũũru nĩũkaũnina o kũũnina biũ thĩinĩ wa Isiraeli, nĩ getha wonage wega.
• 14. Ndũkanakũũrĩrĩre mũtĩ wa mũhaka wa mũndũ ũrĩa mũrigainie, o ũcio wahandirũo nĩ arĩa maarĩ ho tene, thĩinĩ wa igai rĩrĩa ũkagaĩrũo bũrũri ũrĩa Jehova Ngai waku akũheaga ũtuĩke waku.
• 15. Ha ũhoro wa ũũru o na ũrĩkũ ũrĩa mũndũ ekĩte-rĩ, ũira wa mũndũ ũmwe ndũkanarĩĩre, akiuga atĩ nĩekĩte waganu o na ũrĩkũ, kana wĩhia o na ũrĩkũ. No rĩrĩ, ũhoro ũcio nĩũkarĩĩra nĩ ũndũ wa ũira ũrĩa ũheanĩtwo na kanua ka andũ erĩ, kana atatũ.
• 16. Na rĩrĩ, mũira ũtarĩ wa kĩhooto angĩkoimbũra mũndũ o na ũrĩkũ oige atĩ nĩekĩte maũndũ mataagĩrĩire-rĩ,
• 17. andũ acio erĩ, o acio magĩĩte na ngarari, nĩmathiĩ makarũgame mbere ya Jehova o kũu athĩnjĩri-Ngai marĩ, o na aciri arĩa magakorũo kuo matukũ macio;
• 18. nao aciri acio matuĩrie ũhoro ũcio na kĩyo mũno; na atĩrĩrĩ, kũngĩkonwo atĩ mũira ũcio nĩ wa maheni, na atĩ nĩaaigĩrĩire mũrũ wa ithe wao kĩgenyo,
• 19. nĩmũgakĩmwĩka o ta ũrĩa aacirĩire atĩ nĩguo egwĩka mũriũ ũcio wa ithe wao. Ũguo nĩguo mũkeheria ũũru ũcio uume thĩinĩ wanyu.
• 20. Nao andũ arĩa angĩ nĩmakaigua ũhoro ũcio, nao metigĩre, matikanacoke gwĩka ũũru ta ũcio rĩngĩ thĩinĩ wanyu.
• 21. Narĩo riitho rĩaku rĩamuona-rĩ, ndũkanamũiguĩre tha; muoyo ũriumaga muoyo, na riitho riumage riitho, na igego riumage igego, na guoko kuumage guoko, o na kũgũrũ kuumage kũgũrũ.

Home