4. No rĩrĩ, inyuĩ arĩa mwĩgwatanĩtie na Jehova inyuothe mũrĩ muoyo, mũndũ o mũndũ, o na ũmũthĩ.
5. Atĩrĩrĩ, nĩndĩmũrutĩte irĩra cia watho wa kũrũmĩrĩrũo, o na matuĩro ma cira, o ta ũrĩa Jehova Ngai wakwa aanjathaga, nĩguo mũkamekaga mwĩ bũrũri ũcio mũgũthiĩ kwĩgwatĩra ũtuĩke wanyu.
6. Tondũ ũcio mamenyagĩrĩrei o na mũmekage nĩ gũkorũo macio nĩmo marĩonanagia ũũgĩ wanyu, o na ũhoro wanyu wa ũrĩa mũmenyete maũndũ, mũkĩonwo nĩ ndũrĩrĩ iria irĩiguaga ũhoro wothe wa irĩra icio cia watho wa kũrũmĩrĩrũo, nacio ciugage atĩrĩ, Kaĩ ti-itherũ rũrĩrĩ rũrũ rũnene nĩ rũũgĩ-ĩ, o na kaĩ nĩ andũ mamenyete wega maũndũ-ĩ!
7. Nĩ ũndũ-rĩ, nĩ rũrĩrĩ rũrĩkũ rũnene rũĩ na ngai yaruo ĩrũkuhĩhĩirie, o ta ũrĩa Jehova Ngai witũ atũkuhagĩrĩria mahinda marĩa mothe twamũkaĩra?
8. Ningĩ-rĩ, nĩ rũrĩrĩ rũrĩkũ rũnene rũĩ na irĩra cia watho wa kũrũmĩrĩrũo cia kĩhooto, o na matuĩro ma cira ma kĩhooto, ta watho ũyũ wothe ndĩramwatha naguo ũmũthĩ?
9. No rĩrĩ, wee kĩria o kwĩbarĩrĩra, o na ũmenyagĩrĩre ngoro yaku na kĩyo, nĩ getha ndũkae kũriganĩrũo nĩ maũndũ marĩa monirũo nĩ maitho maku, matikanoime ngoro-inĩ yaku matukũ mothe ma muoyo waku; no rĩrĩ, mamenyithagie ciana ciaku, o na ciana cia ciana ciaku.
10. Ũcimenyithie maũndũ ma mũthenyu ũrĩa warũgamire mbere ya Jehova Ngai waku o kũu Horebu, hĩndĩ ĩrĩa Jehova aanjĩrire atĩrĩ, Nyũnganĩria andũ ndĩmaiguithie mohoro makwa, nĩ getha mamenye gũtũũra meĩndigĩrĩte matukũ mao mothe marĩa megũtũũra thĩ, na marutage ciana ciao kwĩĩndigĩra.
11. Na inyuĩ mũgĩthiathia, mũkĩrũgama kũu mũhuro wa kĩrĩma; nakĩo kĩrĩma kĩu gĩgĩakana mwaki ũkinyĩte matu-inĩ, o thĩinĩ wamo mũno; gũgĩkĩgĩa nduma, o na itu, o na nduma ndumanu.
12. Nake Jehova akĩaria na inyuĩ e mwaki-inĩ ũcio thĩinĩ; mũgĩkĩigua mũgambo wa ciugo ikiario, no mũtiigana kuona mũhianĩre wa mũndũ o na ũrĩkũ; tiga o mũgambo wiki mwaiguire.
13. Nake akĩmũmenyithia ũhoro wa kĩrĩkanĩro kĩrĩa aarĩkanĩire na inyuĩ, agĩgĩathana atĩ mũkĩrũmagĩrĩre, nakĩo nĩkĩo maathani marĩa ikũmi; agĩkĩmaandĩka ihengere-inĩ igĩrĩ cia mahiga.
14. Ningĩ Jehova hĩndĩ ĩo agĩkĩnjatha atĩ ndĩmũrute irĩra cia watho wa kũrũmĩrĩrũo, o na matuĩro ma cira, nĩguo mũmarũmagĩrĩre mwĩ bũrũri ũrĩa mũgũthiĩ kwĩgwatĩra ũtuĩke wanyu.
15. Tondũ wa ũrĩa mũtonire mũhianĩre o na ũrĩkũ mũthenya ũrĩa Jehova aaririe na inyuĩ, o kũu Horebu, e mwaki-inĩ thĩinĩ-rĩ, wĩmenyagĩrĩrei mũno,
16. mũtigethũkie, mwĩthondekere mũhianano mwacũhie, wa mũhianĩre wa mũndũ o na ũrĩkũ wa mũndũ mũrũme, kana wa mũndũ-wa-nja.
17. Kana mũhianĩre wa nyamũ o na ĩrĩkũ ĩrĩa ĩrĩ gũkũ thĩ, kana wa nyamũ o na ĩrĩkũ ĩrĩ mathagu ĩthiaga namo igũrũ rĩera-inĩ,
18. kana mũhianĩre wa nyamũ o na ĩrĩkũ ĩtambaga thĩ, kana wa kĩũngũyũ o na kĩrĩkũ kĩrĩa kĩrĩ maĩ-inĩ marĩa marĩ mũhuro wa thĩ;
19. ningĩ wĩmenyagĩrĩre atĩ ũngĩtiira maitho maku ũrore igũrũ matu-inĩ, na wona riũa, na mweri, na njata, o na mbũtũ ciothe cia igũrũ matu-inĩ, ndũkagucĩrĩrio ũciturĩrie ndu ũcihoe, na ũtungatagĩre indo icio Jehova Ngai waku agayanĩtie andũ othe a gũkũ thĩ mũhuro wa igũrũ rĩothe.
20. No rĩrĩ, inyuĩ-rĩ, Jehova nĩaamũnyitire akĩmũruta Misiri, icua-inĩ rĩu rĩa gũtwekia igera, nĩ getha mũtuĩke andũ ake kĩũmbe, o ta ũrĩa gũtariĩ ũmũthĩ.
21. O na ningĩ-rĩ, niĩ ndũire ndakarĩirũo nĩ Jehova nĩ ũndũ wanyu, o na akĩĩhĩta akiuga ndikaringa Jorodani, na atĩ ndigatonya bũrũri ũcio mwega Jehova Ngai waku akũheaga ũtuĩke igai rĩaku;
22. no rĩrĩ, atuĩte atĩ no mũhaka nguĩre gũkũ bũrũri ũyũ na ndikaringa Jorodani; no inyuĩ nĩmũkaringa, mũthiĩ mũkegwatĩre bũrũri ũcio mwega, ũtuĩke wanyu.
23. Kĩĩmenyererei mũno, mũtikariganĩrũo nĩ kĩrĩkanĩro kĩa Jehova Ngai wanyu, kĩrĩa aarĩkanĩire na inyuĩ, mũcoke mwĩthondekere mũhianano wa gwacũhio wa mũhianĩre wa kĩndũ o na kĩrĩkũ kĩrĩa gĩkaananĩtio nĩ Jehova Ngai wanyu.
24. Nĩ gũkorũo Jehova Ngai wanyu atariĩ ta mwaki ũrĩa ũninanaga, na nĩ Mũrungu wĩ ũiru.
25. Hĩndĩ ĩrĩa ũgaciara ciana, o na ũgĩe na ciana cia ciana icio, na mũkorũo mũtũũrĩte hĩndĩ ndaya bũrũri ũcio, na mũcoke mwĩthũkie mwĩthondekere mũhianano mwacũhie mũũhaananie na kĩndũ o na kĩ, na ningĩ mwĩke maũndũ marĩa monagwo marĩ moru nĩ Jehova Ngai wanyu, mũmũthirĩkie nĩguo arakare-rĩ,
26. mũthenya ũyũ wa ũmũthĩ nĩndeta igũrũ na thĩ gũtuĩke aira a atĩ nĩmũkaninwo narua o kũninwo biũ, mweherio bũrũri ũcio mũgũkinya mũkawĩgwatĩre ũtuĩke wanyu; mweka ũguo mũtigatũũra matukũ maingĩ kuo, no nĩ kũninwo mũkaninwo biũ.
27. Jehova nĩakamũharaganĩria ndũrĩrĩ-inĩ, na nĩmũgatigwo thĩinĩ wa ndũrĩrĩ mũrĩ anyinyi mũno mũgĩtarũo, o kũndũ kũrĩa Jehova akamũtwarithia,
28. na mwĩ kũu mũtungatagĩre ngai ingĩ, iria ithondeketwo na mĩtĩ o na mahiga nĩ moko ma andũ, o ngai iria itangĩhota kuona, kana ciigue, kana irĩe kĩndũ, kana inungĩre.
29. No rĩrĩ, mwĩ kũu, mũngĩkarongoria Jehova Ngai wanyu, mũmũrongorie na ngoro yanyu yothe, o na muoyo wanyu wothe, nĩmũkamuona.
31. nĩ gũkorũo Jehova Ngai waku nĩ Ngai wĩ tha mũno; ndagagũtigĩrĩra, kana akũnine biũ, kana ariganĩrũo nĩ kĩrĩkanĩro kĩrĩa aarĩkanĩire na mathoguo, agĩkĩrĩkanĩra nao na mwĩhĩtwa.
32. Nĩ ũndũ-rĩ, rĩu ta hoya ũhoro wa matukũ marĩa mathiru o marĩa maarĩ mbere yaku, gwata mũthenya ũrĩa Ngai ombire mũndũ atũũre gũkũ thĩ, o na ningĩ kuuma gĩturi kĩmwe kĩa matu-inĩ o nginya gĩturi kĩrĩa kĩngĩ, ũũrie kana hihi nĩkũrĩ kwoneka ũndũ ta ũyũ mũnene ũũ, kana gũkĩiguwo ũndũ ũtariĩ taguo?
33. Nĩkũrĩ hihi andũ marĩ maaigua, o na rĩ, mũgambo wa Ngai akĩaria e mwaki-inĩ thĩinĩ, o ta ũrĩa wee ũũiguĩte, na magatũũra muoyo?
34. O na tene-rĩ, kũrĩ kwonwo Ngai athĩgĩrĩirie gũthiĩ kwĩgwatĩra rũrĩrĩ, arũrute thĩinĩ wa rũrĩrĩ rũngĩ na ũndũ wa magerio, na kũringa ciama, na gwĩka maũndũ ma kũgegania, na kũhũrana mbaara, na gwĩka maũndũ na njara ĩrĩ hinya, o na guoko gũtambũrũkĩtio, na gwĩtigĩrithania mũno, o ta ũrĩa maũndũ mothe maatariĩ marĩa Jehova Ngai wanyu ekire kũu Misiri nĩ ũndũ wanyu, mũkĩĩonagĩra na maitho manyu?
35. Wee nĩwe wonirio maũndũ macio, nĩ getha ũmenye atĩ Jehova nĩwe Ngai, na gũtirĩ ũngĩ tiga o we wiki.
37. Na tondũ nĩendete mathoguo-rĩ, nĩkĩo gĩagĩtũmire athure rũciaro rũao rũrĩa rũacokire gũũka thutha wao, akĩrũruta Misiri na ũndũ wa hinya wake mũnene, na agĩtwarana nawe,
38. nĩ getha aingate ndũrĩrĩ nene mũno gũgũkĩra, o na ikagĩa hinya mũno kũrĩ wee, ciehere mbere yaku, nĩguo agũtonyie bũrũri wacio, akũhe ũtuĩke igai rĩaku, o ta ũrĩa gũtariĩ ũmũthĩ.
39. Tondũ ũcio menya ũmũthĩ, o na ũige maũndũ macio ngoro-inĩ yaku, atĩ Jehova nĩwe Ngai ũrĩa wĩ kũrĩa igũrũ matu-inĩ, o na gũkũ thĩ mũhuro warĩo; gũtirĩ ũngĩ o na ũrĩkũ.
40. Nawe menyagĩrĩra irĩra cia watho wake wothe wa kũrũmĩrĩrũo, o na maathani make marĩa ngũgwatha ũmũthĩ, nĩ getha wonage wega wee mwene, o na ciana ciaku iria irĩũkaga thutha waku, na ningĩ nĩ getha matukũ maku maingĩhe wĩ bũrũri ũrĩa Jehova Ngai waku akũheete ũtuĩke waku tene na tene.
41. Hĩndĩ ĩo Musa agĩkĩamũra matũũra matatũ mũrĩmo ũcio wa Jorodani, o mwena ũcio ũrorete irathĩro;
42. nĩ getha mũndũ o na ũrĩkũ ũrĩa ũũragĩte mũndũ orĩre kuo, o ũrĩa ũngĩkorũo oragĩte mũndũ atacirĩire gwĩka ũndũ ũcio, ningĩ o na mbere ĩo akorũo ataamũthũũrĩte; nĩguo mũndũ ũcio angĩũrĩra itũũra rĩmwe rĩa macio, ahonoke.
43. Namo nĩmo Bezeri rĩrĩa rĩrĩ werũ-inĩ, o kũu bũrũri ũrĩa mwaraganu, nĩ ũndũ wa Areubeni; na Ramothu rĩrĩa rĩrĩ Gileadi, nĩ ũndũ wa Agadi; na Goĩani rĩrĩa rĩrĩ Bashani, nĩ ũndũ wa Amanase.
44. Naguo watho ũrĩa Musa aaigĩire ciana cia Isiraeli iũrũmagĩrĩre nĩguo ũyũ:
45. o namo maya nĩmo maũira, o na irĩra cia watho wa kũrũmĩrĩrũo, o na matuĩro ma cira, marĩa Musa aaheire ciana cia Isiraeli ũhoro wamo, thutha wa hĩndĩ ĩrĩa cioimire Misiri,
46. na igĩkorũo irĩ mũrĩmo ũcio wa Jorodani, kĩanda-inĩ kĩrĩa kĩng’etheire Bethi-peoru, o kũu bũrũri wa Sihoni, mũthamaki wa Aamori, ũrĩa watũire Heshiboni, o ũcio wahũrĩrũo nĩ Musa na ciana cia Isiraeli hĩndĩ ĩrĩa cioimire Misiri;
47. nacio ikĩĩgwatĩra bũrũri wake, ũgĩtuĩka wacio, o na bũrũri wa Ogu, mũthamaki wa Bashani; nao acio erĩ nĩo athamaki a Aamori, arĩa maarĩ mũrĩmo ũcio wa Jorodani, mwena ũrĩa ũrorete irathĩro,
48. kuuma Aroeri, rĩrĩa rĩrĩ rũgiki-inĩ rũa kĩanda kĩa Arinoni, nginya o kĩrĩma-inĩ gĩa Sirioni (na nokĩo Herimoni),
49. o na Araba guothe mũrĩmo ũcio wa Jorodani, mwena ũrĩa ũrorete irathĩro, o nginya iria-inĩ rĩa Araba rĩrĩa rĩrĩ mũhuro wa kĩgaragaro kĩa Pisiga.