1. Maathani mothe marĩa ngũgwatha ũmũthĩ-rĩ, mamenyagĩrĩrei mũme kage, nĩ getha mũtũũre muoyo, na mũingĩhe, na nĩ getha mũthiĩ mũkegwatĩre bũrũri ũcio ũtuĩke wanyu, o ũcio Jehova erĩire maithe manyu na mwĩhĩtwa atĩ nĩakamahe;
2. na ũririkanage njĩra ĩrĩa yothe Jehova Ngai waku aagũtongoreirie mĩaka ĩo mĩrongo ĩna, o kũu werũ-inĩ, nĩ getha atũme wĩnyihie, nĩguo akũgerie, amenye maũndũ marĩa marĩ ngoro-inĩ yaku, kana hihi nĩũrĩmenyagĩrĩra maathani make, kana aca.
3. Nake agĩtũma wĩnyihie, na akĩreka ũhũte, agĩcoka agĩkũhe mana ũrĩage, namo maarĩ kĩndũ ũtaamenyete kĩrĩa kĩo, o na kana mathoguo magakĩmenya, nĩ getha akũmenyithie atĩ ti irio ciiki itũũragia mũndũ muoyo, no rĩrĩ, kiugo o gĩothe kĩrĩa kiumaga kanua ka Jehova, nĩkĩo gĩtũũragia mũndũ muoyo.
5. Tũũra ũmenyete na ngoro yaku atĩ o ta ũrĩa mũndũ ahũraga mũriũ, ũguo noguo Jehova Ngai waku akũhũraga.
6. Nawe menyagĩrĩra maathani ma Jehova Ngai waku, ũrũmagĩrĩre njĩra ciake, na ũmwĩtigagĩre.
7. Nĩ gũkorũo Jehova Ngai waku nĩegũgũtwara bũrũri mwega mũno, o bũrũri wĩ twanda twa maĩ, na wĩ ithima, o na marima mariku marĩa matherũkaga maĩ cianda-inĩ, o na irĩma-inĩ,
8. na nĩ bũrũri wĩ ngano nyingĩ, na cairi, na wĩ mĩthabibu na mĩkũyũ, na mĩkomamanga; ningĩ nĩ bũrũri wĩ mĩtamaiyũ ya maguta, o na ũũkĩ;
9. ningĩ wee wĩ bũrũri ũcio ũkarĩaga irio itekwaga, ũkahũna, na ndũrĩ kĩndũ o na kĩ ũkaaga kuo; namo mahiga ma bũrũri ũcio nĩ ma igera theri, na irĩma-inĩ ciakuo nĩkuo ũkenjaga icango.
10. Nawe nĩũkarĩaga ũkahũna, na ũgoocage Jehova Ngai waku nĩ ũndũ wa bũrũri ũcio mwega akũheete.
11. Wĩmenyagĩrĩre mũno ndũkariganĩrũo nĩ Jehova Ngai waku, ũkĩaga kũmenyerera maathani make, na matuĩro make ma cira, o na irĩra cia watho wake wa kũrũmĩrĩrũo, marĩa ngũgwatha ũmũthĩ;
12. gũtigatuĩke atĩ hĩndĩ ĩrĩa ũngĩrĩa irio ũhũne, na ũkorũo wakĩte nyũmba njega, na ũgacitũũra,
13. ningĩ ũhiũ waku wa ng’ombe na wa mbũri ũkorũo wongererekete mũno, nacio betha ciaku na thahabu ciaku ĩkorũo ciongererekete mũno, o na indo ciothe iria wĩ nacio ĩkorũo ciongererekete mũno,
14. hĩndĩ ĩo ngoro yaku ĩĩtũũgĩrie, nawe ũriganĩrũo nĩ Jehova Ngai waku, o we ũrĩa wakũrutire bũrũri wa Misiri, nyũmba ya ũkombo,
15. o na agĩgũtongoria werũ-inĩ mũnene, na wa kũmakania, na warĩ nyamũ-cia-thĩ ĩkũhenia ta mwaki, o na ing’aurũ; nayo nĩ thĩ nyotu mũno, kũndũ gũtarĩ maĩ; na nĩwe wakũrutĩire maĩ ihiga-inĩ rĩa nyaigĩ,
16. nakuo kũu werũ-inĩ agĩgũtũũria na mana, marĩa mathoguo mataamenyete ũhoro wamo; nĩ getha atũme wĩnyihie, na ningĩ nĩ getha akũgerie amenye ũhoro waku ũrĩa ũtariĩ, nĩguo agagwika maũndũ mega matukũ-inĩ maku marĩa ma kũrigĩrĩria;
17. nawe ũcoke wĩĩre na ngoro yaku atĩrĩ, Hinya wakwa, o na ũhoti wa guoko gwakwa, nĩcio inyoneire ũtonga ũyũ.
18. No rĩrĩ, ririkanaga Jehova Ngai waku, nĩ gũkorũo nĩwe ũkũheaga hinya wa kuona ũtonga ũcio, nĩ getha atũme kĩrĩkanĩro kĩrĩa aarĩkanĩire na mathoguo na mwĩhĩtwa kĩrũme wega, u ta ũũ gũtariĩ ũmũthĩ.
19. Na nĩgũgatuĩka atĩrĩ, atĩ ũngĩkariganĩrũo nĩ Jehova Ngai waku, na ũrũmagĩrĩre ngai ingĩ, ũcitungatĩre, na ũcituragĩrie ndu ũcihoe, nĩngũmuumbũrĩra na ma o ma, mũthenya wa ũmũthĩ, atĩ ti-itherũ mũtirĩ hingo mũtakaninwo.
20. O ta ũrĩa ndũrĩrĩ irekwo iria Jehova araninithia ciehere mbere yanyu-rĩ, ũguo noguo na inyuĩ mũkaninwo, nĩ ũndũ wa kũrega kũigua mũgambo wa Jehova, Ngai wanyu.