1. NĨKWAGĨRĨIRE atĩ ngombo ciothe, o icio ciikaraga ta ciĩkĩrĩtwo icoki ngingo-rĩ, ituage atĩ ene cio nĩ a gũtĩagwo mũno, nĩ getha rĩĩtwa rĩa Ngai rĩtikanacambio, o na kana ũrutani ũrĩa ũrutanagwo.
2. Nacio ngombo iria ii na ene metĩkĩtie-rĩ, itikamaime gĩtĩo, kuona atĩ nĩ a Ithe ũmwe nao; nĩ kaba imatungatagĩre wega makĩria, tondũ acio ene cio matũire monaga uumithio nĩ ũndũ wa wĩra wacio nĩ andũ metĩkĩtie, na nĩ andũ mendetwo. Rutanaga maũndũ macio, na ũtaaranage namo.
3. Mũndũ o na ũrĩkũ angĩkorũo nĩarutanaga ũrutani ũngĩ, atetĩkanĩtie na mohoro marĩa maagĩrĩire, o macio ma Mwathani witũ Jesu Kristo, o na ũrutani ũrĩa ũrũmanĩrĩire na ũhoro wa kwĩamũrĩra Ngai-rĩ,
4. mũndũ ũcio nĩ kwĩgatha egathĩte, na ndarĩ ũndũ oĩ, no thuti arĩ nayo ya kũũranganagia ciũria itarĩ bata, na gũkararanĩria o ciugo theri; na nĩho hoimaga ũiru, na ngũĩ, na gũcambania, na gwĩkũũa maũndũ moru,
5. na kũgiana kwa andũ arĩa marĩ na meciria mathũku na matiganĩte na ũhoro-ũrĩa-wa-ma, magakĩĩgereria atĩ ũhoro wa kwĩamũrĩra Ngai nĩguo wa gũtũma mũndũ atonge.
6. Na rĩrĩ, mũndũ kwĩamũrĩra Ngai hamwe na kũiganwo nĩ kĩrĩa arĩ nakĩo, ũguo nĩguo ũtonga mũnene:
7. nĩ ũndũ-rĩ, tũtiarehire kĩndũ gũkũ thĩ, o na gũtirĩ kĩndũ tũngĩhota kũruta kuo;
8. ĩndĩ tũngĩgĩa na irio na nguo-rĩ, no tũiganio nĩcio.
9. No andũ arĩa mendaga gũtonga-rĩ, nĩ kũgũa magũaga magerio-inĩ o na mũtego-inĩ, magathũkio nĩ merirĩria maingĩ ma ũrimũ, o marĩa mathũkagia andũ, namo makamaninũkia magatũma more biũ o ta mahorokerete thĩinĩ wamo.
10. Tondũ rĩrĩ, kwĩrirĩria mbia nĩ kĩhumo kĩa maũũru ma mĩthemba yothe; na andũ amwe, tondũ wa kũhahanya mbia ũguo, nĩmatwarĩrĩirio njĩra-inĩ njũru, magatigana na ũrutani wa Wĩtĩkio, na nĩ gwĩtheca methecete ngoro na kĩeha kĩingĩ.
11. No wee mũndũ wa Ngai-rĩ, kĩũragĩre maũndũ macio, na ũrũmagie ũhoro wa ũthingu, na wa kwĩamũrĩra Ngai, na wa gwĩtĩkia, o na wendani, na ũkirĩrĩria, o na ũhoreri.
12. Rũaga mbaara ĩrĩa njega ya kũrũĩrĩra maũndũ marĩa metĩkĩtio, na wĩnyitĩre muoyo ũrĩa ũtagathira, o ũcio wetirũo ũgĩe naguo hĩndĩ ĩrĩa woimbũrire uumbũri ũrĩa mwega, aira aingĩ marĩ ho.
13.
Ndakwĩra atĩrĩrĩ na ma, twĩ mbere ya Ngai, ũrĩa wĩkagĩra indo ciothe muoyo, o na twĩ mbere ya Kristo Jesu, we woimbũrire uumbũri ũrĩa mwega e mbere ya Pontio Pilato-rĩ,
14. atĩ ũrũmagie rĩathani rĩu wathĩtwo narĩo, rĩikare rĩtathũkĩtio na rĩtacambĩtio, o nginya rĩrĩa Mwathani witũ Jesu Kristo akonanio:
15. nake nĩ kuonanio akonanio, ihinda rĩake rĩakinya, nĩ ũrĩa wĩ Mwene-hinya-wothe we wiki na ũrĩa Mũgathe, o we Mũthamaki wa athamaki na Mwathani wa aathani.
16. Nake nĩwe wiki ũtũũraga muoyo ũrĩa ũtathiraga, agatũũra ũtheri-inĩ ũrĩa ũtarĩ mũndũ ũngĩhota kũũkuhĩhĩria. Gũtirĩ mũndũ o na ũrĩkũ wanamuona, o na kana ũngĩhota kũmuona. Nake arotĩagwo na arogĩa na wathani ũrĩa ũtagathira. Amen.
17. Athaga andũ arĩa matongete na indo matukũ maya atĩ matikae kwĩgatha, o na kana mehoke indo icio itamenyagĩrũo, no mehokage Ngai, we ũtũheaga indo ciothe agĩtũtanahagĩra, nĩ getha tũcihũthagĩre na gĩkeno;
18. ningĩ atĩ mekage wega, atĩ matonge na ũtonga o ũrĩa wa gwĩkaga maũndũ mega, na maikarage mehaarĩirie kũheana indo, matekũrega kũgaĩra andũ angĩ indo na ũtana:
20. Atĩrĩrĩ, Timotheo, menyerera wega ũndũ ũrĩa ũigĩtwo kũrĩ wee ũũramatage, na ũthemage ndereti cia mũhũhũto iria ireganĩte na Ũhoro wa Ngai, na ngarari iria ciĩragwo atĩ nĩciumanĩte na ũmenyo, naguo ti ũmenyo kũrĩ.
21. Andũ amwe-rĩ, tondũ wa ũrĩa mawĩtĩkĩrĩte, nĩmahĩtanĩtie na ũrutani ũrĩa wa Wĩtĩkio.
Wega wa Ngai ũrogĩa na inyuĩ.