1. MARŨA maya nĩ makwa, niĩ Paulo ngombo ya Ngai na mũtũmwo wa Jesu Kristo, ndũmĩtwo nĩ getha andũ arĩa athure nĩ Ngai mongagĩrĩrũo wĩtĩkio, o na ũmenyi wa kũmenya ũhoro-wa-ma ũrĩa ũtwaranĩte na ũhoro wa kwĩamũrĩra Ngai,
2. nĩguo merĩgagĩrĩre muoyo ũrĩa ũtagathira, o muoyo ũcio weranĩirũo mbere ya mĩndĩ na mĩndĩ nĩ Ngai, o we ũtangĩhota kũhenania.
3. Nake nĩaaguũranĩirie Ũhoro wake, mahinda make marĩa maagĩrĩire maakinya, nĩgũtũmĩra andũ ndũmĩrĩri yake, o ĩrĩa ndehokeirũo ndĩmĩkinyanagĩrie, kũringana na ũrĩa gwathanĩtwo nĩ Ngai Mũhonokia witũ.
4.
Atĩrĩrĩ, nĩwe ndaandĩkĩra marũa maya, wee Tito, wĩ mwana wakwa kũna nĩ ũndũ wa wĩtĩkio ũrĩa ũmwe tũgwatanĩire nawe. Ũrogĩa na Wega na thayũ, ciumĩte kwĩ Ngai witũ, o na Kristo Jesu Mũhonokia witũ.
5. Rĩu-rĩ, gĩtũmi kĩrĩa gĩatũmire ngũtige o kũu Kirete nĩ atĩ ũtabaragĩre maũndũ marĩa maatigaire matarĩ matabarĩre, na ũthurage o itũũra athuri ũmatue atabania akuo, o ta ũrĩa ndatigire ndakwĩra.
6.
Mũndũ wa gũthurũo nĩatuĩke mũndũ ũtarĩ ũcuke, mũndũ ũhikĩtie mũtumia o ũmwe, ningĩ arĩ na ciana ciĩtĩkĩtie, na itarĩ kaũndũ ingĩthitakwo nako nĩ ũndũ wa ũmaramari, o na itarĩ cia kũrega watho.
7. Tondũ rĩrĩ, no mũhaka mũrori wa maũndũ ma kanitha atuĩke mũndũ ũtarĩ ũcuke, nĩ ũndũ nĩwe mũrori
wa indo cia Ngai; na ndakanatuĩke mwĩathi kana mũrakari narua, kana wa ngũĩ iria ciumanaga na ũrĩu, kana mũhũri andũ, kana mũhahamĩri indo na njĩra ĩtaagĩrĩire;
8. nĩ kaba atuĩke mwendi gũtugana, na mwendi gwĩkana wega, mũndũ wĩ na ũũgĩ wa ngoro, na wĩ mũthingu, na mũtheru, na ũrĩa wĩgiragĩrĩria merirĩria ma mwĩrĩ;
9. ningĩ nĩatũũre arũmagia ũhoro ũrĩa wa kwĩhokeka, o ũrĩa ũringaine na ũrutani ũrĩa ũrutanagwo, nĩ getha ahote kũhatanĩrĩria na ũrutani ũrĩa mwagĩrĩru, o na ahootage andũ arĩa maũkararagia.
10. Nĩ ũndũ nĩkũrĩ andũ aingĩ aregi watho, andũ a mũhũhũto na ahenania, na makĩria nĩ arĩa a thiritũ ya arĩa maruaga.
12. Mũndũ ũmwe wa rũrĩrĩ rũao, na aarĩ mũnabii wao oigire atĩrĩ, Andũ a Kirete, gũtirĩ hingo matakoragwo marĩ ahenania, na mahaana ta nyamũ njũru, na nĩ igũta ngoroku.
13. Naguo ũira ũcio nĩ wa ma. Tondũ wa ũguo ũmakaanagie ũgwatĩirie, nĩ getha matuĩke andũ agima ũhoro-inĩ wa gwĩtĩkia,
14. na matikarũmbũyagie ng’ano cia Ayahudi, na maathani ma andũ arĩa mahutatagĩra ũhoro-ũrĩa-wa-ma.
15. Maũndũ mothe nĩ matheru kũrĩ andũ arĩa me na meciria matheru; ĩndĩ kũrĩ andũ arĩa a meciria mathũku na matetĩkĩtie-rĩ, gũtirĩ ũndũ o na ũmwe mũtheru; no rĩrĩ, ngoro ciao o na thamiri ciao no thũku o cierĩ.
16. Kuuga nĩmoigaga atĩ nĩmoĩ Ngai; no maũndũ marĩa mekaga nĩmo monanagia atĩ nĩmamũkaanĩte, nĩ ũndũ wa ũrĩa maikaraga marĩ imaramari na marĩ aremi, na ha ũhoro wa wĩra o wothe mwega magakorũo marĩ andũ matarĩ kĩene.