1. NO wee-rĩ, aragia maũndũ o marĩa merekanĩrĩire na ũrutani ũrĩa mwagĩrĩru:
2. nĩguo atĩ athuri arĩa akũrũ mathemage ũrĩu, na maikarage matarĩ na itherũ, na marĩ na ũũgĩ wa ngoro, na marĩ andũ agima ũhoro-inĩ wa gwĩtĩkia, na wa kwendana, na wa gũkirĩrĩria:
3. na ningĩ atĩ atumia arĩa akũrũ o nao maikarage na mĩikarĩre ĩrĩa ya ũtheru, na matigacambanie, o na matikamenyere kũnyuaga ndibei nyingĩ matuĩke ta ngombo ciayo, no nĩmatuĩke arutani a maũndũ marĩa maagĩrĩire;
4. nĩ getha mamenyagĩrie atumia arĩa ethĩ ũrĩa mangĩendaga athuri ao o na ciana ciao,
5. na maikarage marĩ na ũũgĩ wa ngoro, na matuĩke a mĩtugo mĩtheru, na marutage wĩra o wa kwao mũciĩ, na matuĩke atugi, na maathĩkage nĩ athuri ao ene, nĩ getha Ũhoro wa Ngai ndũkanacambio.
6. Aanake nao ũmataarage atĩ maikarage marĩ na ũũgĩ wa ngoro.
7. Na maũndũ-inĩ mothe-rĩ, wĩtuage wa kuonanĩrĩria gwĩkaga maũndũ mega: naguo ũrutani waku wage ũndũ mũthũku, na wage itherũ,
8. na ũrutanagwo na ciugo iria ciagĩrĩire, o iria itangĩhota gũtuwo njũru; nĩ getha mũndũ ũrĩa ũtũkararagia aconoke nĩ ũndũ wa ũrĩa aagĩte ũndũ mũũru wa kwaria ũhoro-inĩ witũ.
9. Taaraga ngombo nacio atĩ ciathĩkagĩre ene cio, na imakenagie maũndũ-inĩ mothe, itekũmakararia,
10. na itekũnyitanga indo ciao, no makĩria cionanagie ũrĩa ciĩhokekete wega, nĩ getha itĩithagie ũrutani ũrĩa wa Ngai Mũhonokia witũ maũndũ-inĩ mothe.
12. naguo nĩguo ũtũmenyagĩria kũregana na maũndũ mothe marĩa mataiguaine na ũhoro wa kwĩamũrĩra Ngai, o na merirĩria marĩa moru ma gũkũ thĩ, na tũikarage twĩ na ũũgĩ wa ngoro, na tũrĩ athingu, na twĩamũrĩire Ngai mahinda maya tũrĩ,
13. tũgĩtanyaga gũkahingĩrio kĩĩrĩgĩrĩro kĩrĩa kĩĩ na kĩrathimo, hĩndĩ ĩrĩa gũkaguũranĩrio riri wa Jesu Kristo, ũrĩa wĩ Ngai witũ mũnene na Mũtũhonokia.
14.
Nake nĩwe werutire nĩ ũndũ witũ, nĩ getha atũkũũre waganu-inĩ wothe, na atherie andũ a gũtuĩka ake kĩũmbe, arĩa marĩ na kĩyo gĩa gwĩkaga maũndũ mega.
15. Rĩu-rĩ, aragia maũndũ macio, na ũhatanagĩrĩrie, na ũkaananagie ũrĩ na wathani wothe. Ndũkanareke mũndũ o na ũmwe akũmene.