Go Back

Ahibirania Chapter 11

• 1. RĨU-RĨ, wĩtĩkio nĩguo ũmenyithanagia atĩ maũndũ marĩa merĩgĩrĩirũo nĩ ma ma, na nĩguo wĩ kĩhooto gĩa kũmenyithania atĩ maũndũ marĩa matonekaga marĩ ho.
• 2. Amu-rĩ, nĩ ũndũ waguo athuri arĩa a tene nĩmaagĩire na ngumo njega.
• 3. Tondũ wa gwĩtĩkia-rĩ, tũmenyithagio atĩ thĩ ciothe nĩciombirũo na kiugo kĩa Ngai, na tondũ ũcio, atĩ indo iria cionagwo itiathondekirũo ciumanĩte na indo o iria ciakorirũo irĩ o ho.
• 4. Nĩ ũndũ wa gwĩtĩkia-rĩ, Habili nĩaarutĩire Ngai igongona rĩega rĩakĩrĩte rĩrĩa rĩa Kaini, na nĩ ũndũ warĩo nĩoimbũrirũo atĩ aarĩ mũthingu, nĩ ũndũ Ngai nĩaaheanire ũira nĩ gwĩtĩkĩra maruta marĩa aarutire. Na nĩ ũndũ wa wĩtĩkio ũcio wake-rĩ, o na aakuire, no aaragia o na rĩu.
• 5. Nĩ ũndũ wa gwĩtĩkia, Enoku nĩeheririo ndakanakue, na ndacokire kuonwo tondũ Ngai nĩamweheririe. Tondũ ataneherio-rĩ, nĩaakorirũo oimbũrĩtwo atĩ Ngai nĩaakenagio nĩwe.
• 6. Na rĩrĩ, gũtarĩ na wĩtĩkio gũtingĩkĩhoteka kũmũkenia, nĩ gũkorũo mũndũ ũrĩa ũkũrongoria Ngai no kinya etĩkie atĩ nĩatũire ho, na atĩ nĩwe ũheaga andũ arĩa mamũcaragia ngerenwa yao.
• 7. Nĩ ũndũ wa gwĩtĩkia, Nuhu aataarũo nĩ Ngai ũhoro-inĩ wa maũndũ matarĩ maroneka, akĩmwĩtigĩra, agĩgĩthondeka thabina ya kũhonokia andũ ake; na nĩ ũndũ wa gwĩka ũguo, akĩonania atĩ kĩrĩndĩ gĩa thĩ nĩkĩahĩtĩtie, nake agĩtuĩka wa kũgaĩrũo ũthingu ũrĩa uumanaga na ũhoro wa gwĩtĩkia.
• 8. Nĩ ũndũ wa gwĩtĩkia-rĩ, Iburahimu, rĩrĩa etirũo, agĩĩtĩka, akiuma kwao athiĩ kũndũ kũrĩa akaheo thutha gũtuĩke igai rĩake; agĩkiuma kũu atoĩ kũrĩa egũthiĩ.
• 9. Nĩ ũndũ wa gwĩtĩkia agĩikara bũrũri ũrĩa weranĩirũo e mũgeni, ta arĩ mũthamĩri kuo, agatũũraga mahema-inĩ me hamwe na Isaaka na Jakubu, o arĩa maarĩ a kũgaĩrũo hamwe nake kĩĩranĩro o ro kĩu.
• 10. Tondũ nĩaatanyĩte kuona itũũra rĩrĩa rĩakĩtwo gĩtina kĩrũmu, o rĩo mwaki warĩo na mũthondeki nĩ Ngai.
• 11. Nĩ ũndũ wa gwĩtĩkia, o nake Sara akĩheo hinya wa kwĩgwatĩra ihu rĩrĩa hĩndĩ yake ya gũciara yathirĩte, nĩ gũkorũo nĩaatuĩte atĩ Ũrĩa wamwĩrĩire ũguo nĩ wa kwĩhokwo,
• 12. na tondũ wa ũguo, gũgĩciarũo nĩ mũndũ ũmwe, nake no ta arĩ mũndũ mũkuũ, andũ maingĩhĩte o ta njata cia igũrũ, o na ta mũthanga ũrĩa ũtangĩtarĩka wĩ hũgũrũrũ-inĩ cia iria.
• 13. Andũ acio othe-rĩ, maakuire marũmĩtie ũhoro ũcio wa gwĩtĩkia, na matarĩ maahingĩrio ciĩranĩro; ĩndĩ nĩmaacionaga irĩ kũraya magacikũngũĩra, makiumbũraga atĩ no ageni na agendi gũkũ thĩ.
• 14. Na rĩrĩ, andũ arĩa maaragia maũndũ ta macio nĩmonanagia wega atĩ nĩ gũcaria maracaria bũrũri ũngĩtuĩka wao ene.
• 15. Na mangĩatũire maririkanaga bũrũri ũrĩa moimĩte mawĩrirĩrie-rĩ, nĩmangĩonire hĩndĩ ya gũcoka kuo.
• 16. Ĩndĩ rĩu, ũrĩa meriragĩria kuona nĩ bũrũri mwega kũrĩ ũcio, naguo nĩ bũrũri wa Igũrũ, na nĩkĩo Ngai atangĩconoka nĩ gwĩtwo Ngai wao, nĩ ũndũ nĩamathondekeire itũũra.
• 17. Nĩ ũndũ wa gwĩtĩkia-rĩ, Iburahimu, aagerio, nĩaarutire Isaaka atuĩke wa igongona; ũcio waamũkĩrĩte ciĩranĩro icio-rĩ, agĩgĩkorũo akĩruta o mwana wake wa mũmwe atuĩke wa igongona;
• 18. o we werĩtwo ũhoro wake atĩ, Thĩinĩ wa Isaaka nĩho mbeũ ĩrĩ ĩrĩa ĩrĩĩtanagio nawe.
• 19. Nake nĩ gũtua aatuĩte na ngoro atĩ Ngai aahota kũriũkia mũndũ, o na arĩ mũkuũ; naguo ũhoro ũcio ũkĩgerekanio, nĩ gũcokerio aacokeirio mũriũ ta oimĩte kũrĩ arĩa akuũ.
• 20. Nĩ ũndũ wa gwĩtĩkia-rĩ, Isaaka nĩaarathimire Jakubu na Esau, akĩratha ũhoro wa maũndũ marĩa magoka.
• 21. Nĩ ũndũ wa gwĩtĩkia, Jakubu, rĩrĩa aakiriĩ gũkua-rĩ, akĩrathima ariũ a Jusufu, o mũndũ o mũndũ, agĩthathaiya Ngai etiirĩte na mũthĩgi wake.
• 22. Nĩ ũndũ wa gwĩtĩkia, Jusufu nake, hĩndĩ ĩrĩa aakiriĩ gũkua-rĩ, nĩaagwetire ũhoro wa ciana cia Isiraeli wa kuuma kũu maarĩ; na agĩathana ũhoro wa mahĩndĩ make.
• 23. Nĩ ũndũ wa gwĩtĩkia, Musa, aaciarũo-rĩ, akĩhithwo mĩeri ĩtatũ nĩ aciari ake, tondũ nĩmonire arĩ mwana mũthaka, na matiigana gwĩtigĩra watho wa mũthamaki.
• 24. Nĩ ũndũ wa gwĩtĩkia-rĩ, Musa, aatuĩka mũndũ mũgima, akĩrega gũtuwo mũriũ wa mwarĩ wa Firauni;
• 25. agĩgĩthura kaba kũnyariranĩrio na andũ a Ngai, gũkĩra gwĩkenia ihinda na mĩago ya wĩhia,
• 26. tondũ nĩaatuĩte atĩ kũmenwo nĩ ũndũ wa Kristo nĩ ũtonga mũnene gũkĩra indo iria ii bata cia Misiri; nĩ ũndũ nĩaatanyĩte kuona kĩheo kĩa ngatho kĩrĩa gĩkaheanwo.
• 27. Nĩ ũndũ wa gwĩtĩkia, akiuma Misiri ategwĩtigĩra marakara ma mũthamaki; nĩ gũkorũo nĩaakirĩrĩirie, ta monanĩte na Ũrĩa ũtangĩoneka.
• 28. Nĩ ũndũ wa gwĩtĩkia, akĩambĩka gĩathĩ gĩa kũrĩa Bathaka, o na ũhoro wa kũminjaminjanĩrio thakame, nĩ getha ũrĩa waninire marigithathi ndakae kũmahutia.
• 29. Nĩ ũndũ wa gwĩtĩkia-rĩ, magĩtuĩkanĩria Iria rĩrĩa Itune ta arĩ thĩ nyũmũ maagereire; no Amisiri, maageria gwĩka ũguo-rĩ, makĩrindwo nĩ iria.
• 30. Nĩ ũndũ wa gwĩtĩkia-rĩ, njirigo cia mahiga iria cia Jeriko nĩciagũire, ciarĩkia gũthiũrũrũkwo matukũ mũgwanja.
• 31. Nĩ ũndũ wa gwĩtĩkia, Rahabu, mũka ũrĩa wa maraya, ndaigana kũninanĩrio na andũ arĩa aremi, nĩ ũndũ nĩaagwatire athigani arĩa ũgeni hatarĩ buruga.
• 32. Na nĩ ũndũ ũrĩkũ ũngĩ ingĩcoka kuuga? Amu ndingĩona hĩndĩ ya kũheana ũhoro wa Gideoni na Baraka na Samusoni na Jefitha, na ningĩ wa Daudi na Samweli o na wa anabii.
• 33. Acio othe-rĩ, tondũ wa gwĩtĩkia nĩmaatoririe mabũrũri ma athamaki amwe, magĩĩka maũndũ ma ũthingu, makĩhingĩrio ciĩranĩro, na makĩhinga mĩrũthi tũnua,
• 34. ningĩ makĩhoria hinya wa mwaki, na makĩhonokio matikaninwo na hiũ, magĩĩkĩrũo hinya rĩrĩa maahinyarĩte, magĩtuĩka njamba mbaara-inĩ, na makĩingata mbũtũ cia ita cia ndũrĩrĩ ingĩ.
• 35. Andũ-a-nja makĩriũkĩrio andũ ao arĩa maakuĩte. Andũ angĩ magĩtandiũrũo ũũru mũno, makĩrega marekio, nĩ getha makariũkio magĩe na muoyo mwega makĩria.
• 36. Angĩ ao makĩgerio na kũnyũrũrio na kũhũrũo na iboko irĩ njaaga, ningĩ na kuohwo na gũikio korokoro-inĩ.
• 37. Angĩ makĩũragwo na mahiga, angĩ magĩatũranio na mĩthumeno, angĩ makĩgerio meke ũũru, angĩ makĩũragwo na rũhiũ; ningĩ kũrĩ maacangacangaga mehumbĩte njũa cia ng’ondu na cia mbũri; o na kũrĩ maatũire matarĩ na kĩndũ, na mathĩnĩkĩte, na magekagwo ũũru.
• 38. (Nao-rĩ, gũkũ thĩ gũtiamaagĩrĩire nĩguo matũũre kuo.) Ningĩ nĩmorũraga mawerũ-inĩ, na irĩma-inĩ, na ngurunga-inĩ, na miungu-inĩ ya thĩ.
• 39. Nao acio othe-rĩ, o na moimbũrĩtwo nĩ wĩtĩkio wao ũrĩa maatariĩ-rĩ, matiigana kũhingĩrio kĩĩranĩro kĩrĩa kĩeranĩirũo,
• 40. nĩ gũkorũo o mbere Ngai nĩaatũthondekeire ithuĩ ũndũ mwega makĩria, nĩguo atĩ andũ acio matigatuwo aagĩrĩru kũna ithuĩ tũtarĩ ho.

Home