1. HAKĨRĨ ũguo-rĩ, kuona atĩ nĩtũthiũrũrũkĩirio nĩ aira aingĩ ũũ, mahaana ta itu rĩnene, o na ithuĩ nĩtwĩaũre kĩrĩa gĩothe gĩtũritũhĩire, o na wĩhia ũrĩa ũtũrigicaga mũno, tũgĩteng’ere kĩhĩtahĩtano-inĩ kĩrĩa tũigĩirũo mbere iitũ tũkirĩrĩirie,
2. o tũcũthĩrĩirie Jesu, ũrĩa wĩ mwambĩrĩria na mũhingia wa wĩtĩkio ũrĩa twĩtĩkĩtie. We-rĩ, nĩ ũndũ wa gĩkeno kĩrĩa aaigĩirũo mbere yake, nĩaakirĩrĩirie ũhoro wa kwambwo mũtharaba-inĩ, atekũũria gũconorũo, na rĩu nĩaikaire thĩ mwena wa ũrĩo wa gĩtĩ-gĩa-ũthamaki kĩrĩa kĩa Ngai.
3. Rĩu-rĩ, nĩ getha mũtikae kũnoga kana kũũrũo nĩ hinya ngoro-inĩ, cũraniai ũhoro wa ũcio wakirĩrĩirie ngarari nyingĩ ũũ cia ehia magĩkararania nake.
4. Inyuĩ-rĩ, mũtirĩ mũrarũa o nginya mũkoira thakame mũkĩgianaga na mehia:
5.
na nĩmũriganĩirũo nĩ ũhoro wa kũmũhatĩrĩria ũrĩa mũtaaragwo naguo ta mwĩ ciana, mũkerũo atĩrĩ:
Mũrũ wakwa, menya gũkaira iherithia rĩa Mwathani,
Kana ũũrũo nĩ hinya warũithio nĩwe.
6. Nĩ gũkorũo ũrĩa Mwathani endete, nĩwe aherithagia,
Na akahũra mwana o wothe ũrĩa etĩkagĩra.
7. Inyuĩ nĩmũkiragĩrĩria nĩ getha mũrutagwo o mũkĩherithagio; Ngai amwĩkaga o ta mũrĩ ciana ciake; nĩ ũndũ-rĩ, nĩ mwana ũrĩkũ ũtaherithagio akĩrutwo nĩ ithe?
8. Ĩndĩ mũngĩikara mũtekũherithio iherithia rĩrĩa rĩmenyeretwo nĩ andũ othe-rĩ, mũrĩ ciana cia mũka wa njĩra, mũtirĩ ciana ii na mwene.
9. Ningĩ-rĩ, twarĩ na maithe maitũ arĩa maatũciarire mũciarĩre wa mwĩrĩ, nao nĩmaatũherithagia na tũkamekagĩrĩra. Githĩ tũtiagĩrĩirũo o makĩria nĩ gwathĩkagĩra Ithe wa maroho maitũ, tũgĩtũũre muoyo?
10. Nĩ gũkorũo acio nĩmaatũherithagia o matukũ manyinyi, o ta ũrĩa mendaga; ĩndĩ we Ngai-rĩ, ekaga ũguo nĩguo atũgune, nĩ getha tũgwatanĩre nake ũtheru wake.
11. Kũherithio o guothe kuonagwo o ihinda rĩakuo ta gũtarĩ gĩkeno, tiga o kĩeha: no rĩrĩ, thutha-inĩ nĩkũrehagĩre andũ arĩa mamenyeretio nakuo maciaro me na thayũ, marĩa moimanĩte na ũthingu.
12.
Nĩ ũndũ ũcio-rĩ, tambũrũkiai moko marĩa macunjurĩte, o na maru marĩa maregerete:
13.
na mwĩrũngarĩrie njĩra cia makinya manyu, nĩ getha kĩrĩa gĩthuaga gĩtikagonyorũo, no kaba kĩhonio.
14. Geriai na kĩyo gũikarania mũiguanĩte na andũ othe, na kũgĩa na ũtheru o ũrĩa, mũndũ angĩkorũo awagĩte-rĩ, ndakonana na Mwathani.
15.
Wĩmenyererei atĩ mũndũ o wothe wanyu ndakaage gũkinyĩrũo nĩ Wega wa Ngai; o na kana ũndũ mũũru ũtariĩ ta mũri wa mũtĩ mũrũrũ ũmere kũrĩ inyuĩ ũmũtangage, na andũ aingĩ magĩe na thahu nĩ ũndũ waguo;
16. ningĩ atĩ gũtikanagĩe na mũhũri maraya kana mũndũ ũtetigagĩra Ngai, ta Esau, ũrĩa wendirie ũrigithathi wake ũkiuma irio cia rũĩga rũmwe.
17.
Tondũ nĩmũũĩ atĩ thutha ũcio, rĩrĩa aacokire kwenda kũgaĩrũo kĩrathimo, akĩregerũo, o na aageragia mũno gũkĩona akĩrĩraga maithori, nĩ ũndũ ndaigana kuona kamweke ga kwĩrira.
18.
Tondũ rĩrĩ, mũtikinyĩte kĩrĩma-inĩ kĩrĩa kĩngĩhutĩka na gĩakanĩte mwaki, kana mũgakinya kũrĩa kwĩ na itu rĩthimbu, na nduma, na kĩhuhũkanio
19. na mũgambĩre wa coro, o na mũgambo ũkĩaria. Naguo arĩa maaũiguire-rĩ, magĩthaithana atĩ matigacoke kũheo ũhoro ũngĩ o na ũmwe;
20. nĩ gũkorũo matiahotire gwĩtiiria ũhoro ũyũ waathanĩtwo atĩrĩ, O na nyamũ yo ĩngĩhutia kĩrĩma gĩkĩ-rĩ, no ĩhũrũo na mahiga ĩkue.
21. Naguo ũndũ ũcio wonekire ũkĩrehe kĩmako kĩnene ũguo, ũgĩgĩtũma Musa oige atĩrĩ, Nĩngwĩtigĩra mũno o na ngainaina.
26. Ũcio nĩwe mũgambo wake watũmire thĩ ĩthingithe hĩndĩ ĩo: no rĩu nĩeranĩire akoiga atĩrĩ, O ihinda rĩmwe rĩngĩ-rĩ, nĩndĩĩtũma thĩ ĩthingithe, na to thĩ iiki, o na igũrũ narĩo rĩthingithe.