1. RĨU-RĨ, ha ũhoro wa maũndũ macio twamwĩra, ũndũ ũrĩa wĩ bata makĩria nĩ ũyũ, atĩ nĩtũrĩ na mũthĩnjĩri-Nga-mũnene ũtariĩ o ũguo, nake nĩaikarĩte thĩ mwena wa ũrĩo wa gĩtĩ-gĩa-ũthamaki kĩrĩa kĩa ũrĩa Mwene-Ũkaru wĩ kũrĩa Igũrũ.
2. Nake nĩ mũtungatĩri wa handũ harĩa hatheru, na wa gĩikaro kĩrĩa kĩa ma, o kĩrĩa gĩaakirũo nĩ Mwathani, na ti mũndũ.
3. Na rĩrĩ, mũthĩnjĩri Ngai-mũnene o wothe nĩatuagwo wa kũrutagĩra Ngai maruta na magongona; na tondũ wa ũguo, ũcio nake no kinya akorũo e na kĩndũ gĩa kũruta.
4. Nake angĩrĩ gũkũ thĩ-rĩ, ndangĩtuĩka mũthĩnjĩri-Ngai o na atĩa, kuona atĩ nĩkũrĩ athĩnjĩri-Ngai arĩa marutagĩra Ngai maruta o marĩa maathanĩtwo watho-inĩ.
5. Acio-rĩ, ũndũ ũrĩa matungatagĩra no mũhianĩre wa maũndũ ma Igũrũ, o na kĩĩruru kĩamo: o ta ũrĩa Musa aataarirũo nĩ Ngai hĩndĩ ĩrĩa aaitĩkire gwaka gĩikaro kĩrĩa; amu nĩerirũo atĩrĩ, Menyerera atĩ ũthondeke indo ciothe ũkĩihaananagia na mũhianĩre ũrĩa woneirio kĩrĩma-inĩ.
6. Ĩndĩ mũthĩnjĩri-Ngai ũyũ nĩagĩĩte na ũtungati mwega makĩria, ũkĩrĩte ũcio wa tene kũringana na ũrĩa atuĩkĩte mũiguithania wa kĩrĩkanĩro kĩega kũrĩ kĩrĩa gĩa tene, o kĩrĩa kĩrĩkanĩro na ciĩranĩro njega kũrĩ iria cia tene.
7. Nĩ ũndũ-rĩ, kĩrĩkanĩro kĩrĩa kĩa mbere kĩngĩakorirũo gĩtarĩ na ihĩtia, gũtingĩagĩcokire kũgĩa na bata wa kĩngĩ gĩa kerĩ.
8.
Ĩndĩ Ngai nĩekuonania ihĩtia rĩao akamera ũũ:
Atĩrĩrĩ, matukũ nĩmagoka, ũguo nĩguo Mwathani oiga,
Marĩa ngarĩkanĩra kĩrĩkanĩro kĩerũ na nyũmba ya Isiraeli na nyũmba ya Juda;
9. Nakĩo kĩrĩkanĩro kĩu gĩtigatuĩka ta kĩrĩa ndarĩkanĩire na maithe mao,
Hĩndĩ ĩrĩa ndamanyitire na guoko ngĩmaruta bũrũri wa Misiri;
Nĩ ũndũ matiigana kũrũmia kĩrĩkanĩro kĩu,
Na niĩ ngĩaga kũmatindĩrĩra, ũguo nĩguo Mwathani oiga.
10. Amu-rĩ, gĩkĩ nĩkĩo kĩrĩkanĩro kĩrĩa ngarĩkanĩra na nyũmba ya Isiraeli,
Matukũ macio maathira, ũguo nĩguo Mwathani oiga;
Nĩ gwĩkĩra ngekĩra mawatho makwa thĩinĩ wa meciria mao,
Na ningĩ ndĩmaandĩke ngoro-inĩ ciao;
Na niĩ nduĩke Ngai wao,
Nao matuĩke andũ akwa.
11. Nao matigacoka kũrutana mũndũ na mũndũ ũrĩa ũngĩ,
O na kana mũndũ arute mũrũ wa ithe, akĩmwĩra atĩrĩ:
Umĩrania ngoro na Mwathani:
Nĩ gũkorũo andũ othe nĩmagakorũo ma’menyete,
Kuuma o ũrĩa mũnyinyi wao gwata ũrĩa mũnene.
12. Nĩ ũndũ nĩngamakirĩra waganu wao,
O namo mehia mao ndigacoka kũmaririkana o rĩ o rĩ.
13. Na rĩrĩ, aagweta kĩrĩkanĩro kĩerũ-rĩ, nĩ gũtua aatuire kĩrĩa kĩa mbere gĩkũrũ. Nakĩo kĩndũ o kĩrĩa kĩrakũra na gĩgatuĩka gĩa tene, nĩgĩkiriĩ kũbuĩria o biũ.