1. Naguo bũrũri ũrĩa wagũĩrĩire ciana cia Jusufu wacukĩrũo mĩtĩ-rĩ, warutĩtio Jorodani, o kũu Jeriko, mwena wa irathĩro wa maĩ ma Jeriko kũu werũ-inĩ, ũgĩkĩambata uumĩte Jeriko, ũgĩtuĩkanĩria bũrũri ũrĩa wĩ irĩma nyingĩ, ũgĩkinya Beth-eli;
2. ningĩ woima Beth-eli ũgĩkinya Luzu, ũgĩkĩhungurĩra mũhaka-inĩ wa Aariki ũgĩkinya o Atarothu
3. ningĩ ũgĩikũrũka na mwena wa irathĩro, ũgĩkinya mũhaka-inĩ wa Ajafileti, o mũhaka-inĩ wa Bethi-horoni ya mũhuro, o na Gezeri; nayo nyumĩrĩra yaguo yarĩ iria-inĩ.
4. Ciana icio cia Jusufu, Efiraimu na Manase, igĩkĩgwata igai rĩacio.
5. Naguo mũhaka wa ciana cia Efiraimu, o ta ũrĩa mbarĩ ciacio ciatariĩ, wathiĩte ũũ: mwena wa irathĩro-rĩ, mũhaka wa bũrũri ũcio warĩ igai rĩacio woimĩte Atarothu-adari nginya Bethi-horoni ya rũgongo igũrũ;
6. ningĩ mwena wa ithũĩro, mũhaka ũcio ũgĩthiĩ o ro ũguo ũrorete kũu Mikemethathu mwena wa gathigathini, ũgĩcoka, ũkĩrigicũka na mwena wa irathĩro, ũgĩkinya itũũra rĩetagwo Taanathu-shilo, ũgĩgĩthiĩ wĩgiritanĩtie narĩo o kũu mwena wa irathĩro wa Janoa;
7. ũgĩcoka ũgĩikũrũka uumĩte Janoa ũgĩkinya Atarothu, na Naara, ũgĩgĩkinya o Jeriko, ũgĩthiĩ kuumĩrĩra Jorodani.
8. Ningĩ woima Tapua, ũgĩthiĩ o ro ũguo ũrorete mwena wa ithũĩro, ũgĩkinya karũũĩ ga Kana; nayo nyumĩrĩra yaguo yarĩ o kũu iria-inĩ. Rĩu nĩrĩo igai rĩa mũhĩrĩga wa ciana cia Efiraimu, o ta ũrĩa mbarĩ ciaguo ciatariĩ,
9. hamwe na matũũra marĩa maamũrĩtwo nĩ ũndũ wa ciana icio cia Efiraimu bũrũri wa ciana cia Manase, o matũũra macio mothe, hamwe na tũtũũra twamo.
10. Nacio ciana cia Efiraimu itiigana kũingata Akanaani arĩa maatũire Gezeri; no Akanaani acio maatũũrire thĩinĩ wa Efiraimu, o na ũmũthĩ, nao magĩgĩtuĩka ndungata ciacio cia gũcirutagĩra wĩra o ta ũrĩa maathagwo.