1. Naguo mũhĩrĩga wa Manase, irigithathi rĩa Jusufu, ũgĩcukĩrũo mĩtĩ ũũ: Makiru, irigithathi rĩa Manase, na nĩwe ithe wa Gileadi, tondũ aarĩ mũndũ wa ita, aakĩheirũo Gileadi, o na Bashani.
2. Nacio ciana iria ingĩ cia Manase igĩcukĩrũo mĩtĩ o ta ũrĩa mbarĩ ciacio ciatariĩ; ĩgĩgĩcukwo nĩ ũndũ wa ciana cia Abiezeri, o na ciana cia Heleku, o na ciana cia Asirieli, o na ciana cia Shekemu, o na ciana cia Heferi, o na ciana cia Shemida; icio nĩcio ciana cia ihĩĩ cia Manase wa Jusufu, o ta ũrĩa mbarĩ ciacio ciatariĩ.
3. No rĩrĩ, Zelofehadi wa Heferi, mũrũ wa Gileadi wa Makiru, ũrĩa warĩ mũrũ wa Manase, ndaarĩ na ihĩĩ, tiga o airĩtu; namo maya nĩmo marĩĩtwa ma airĩtu acio ake, Mahala, na Noa, na Hogila, na Milika na Tiriza.
4. Nao magĩthengerera Eleazaru, mũthĩnjĩri-Ngai, o na Joshua wa Nuni, o na anene, makiuga atĩrĩ, Jehova nĩaathire Musa atĩ o na ithuĩ atũhe igai thĩinĩ wa ariũ a ithe witũ; tondũ ũcio airĩtu acio magĩkĩheo igai thĩinĩ wa ariũ a ithe wao o ta ũrĩa Jehova aathanĩte.
5. Na rĩrĩ, Manase agĩkĩgũĩrũo nĩ icunjĩ ikũmi, thengia mabũrũri wa Gileadi na Bashani, marĩa maarĩ mũrĩmo ũcio ũngĩ wa Jorodani;
6. nĩ ũndũ airĩtu a Manase nĩmaagwatire igai thĩinĩ wa ariũ ake; naguo bũrũri wa Gileadi ũgĩtuĩka wa ihĩĩ iria ingĩ cia Manase.
7. Naguo mũhaka wa Manase ũkĩrutio o kũu Asheri, ũgĩkinya Mikemethathu, rĩrĩa rĩng’etheire Shekemu; naguo mũhaka ũcio ũkĩhungurĩra mwena wa ũrĩo, ũgĩkinya kwa andũ arĩa matũũraga Eni-tapua.
8. Naguo bũrũri ũcio wa Tapua warĩ wa Manase; no rĩrĩ, itũũra rĩa Tapua, rĩa mũhaka-inĩ wa Manase, rĩarĩ rĩa ciana cia Efiraimu.
9. Naguo mũhaka ũcio ũgĩikũrũka ũgĩthiĩ gũtheca karũũĩ ga Kana mwena wa gũthini wa karũũĩ kau. Namo matũũra marĩa me kũu nĩ ma Efiraimu no me thĩinĩ wa matũũra ma Manase; naguo mũhaka wa Manase warĩ mwena wa gathigathini wa karũũĩ kau, nayo nyumĩrĩra yaguo yarĩ o iria-inĩ;
10. mwena wa gũthini-rĩ, warĩ wa Efiraimu, naguo mwena wa gathigathini nĩguo warĩ wa Manase, narĩo iria nĩrĩo rĩarĩ mũhaka wa Manase; nayo mĩhĩrĩga ĩo yerĩ yakinyĩte o Asheri, mwena wa gathigathini, o na ĩgakinya Isakaru, mwena wa irathĩro.
11. Naguo mũhĩrĩga wa Manase ũgĩkorũo warĩ na matũũra mamwe thĩinĩ wa Isakaru, o na thĩinĩ wa Asheri, namo nĩ maya, Bethi-sheani, hamwe na mĩciĩ yarĩo, na Ibileamu na mĩciĩ yarĩo, o na andũ arĩa maatũũraga Doru na mĩciĩ yarĩo, o na andũ arĩa maatũũraga Eni-doru, na mĩciĩ yarĩo, o na arĩa maatũũraga Tanaku na mĩciĩ yarĩo, o na andũ arĩa maatũũraga Megido, o na mĩciĩ yarĩo, o kũu kwarĩ ithũngũri ithatũ.
12. No rĩrĩ, ciana cia Manase itiigana kũhota kũingata andũ arĩa maatũũraga matũũra macio; no Akanaani nĩ gũtũũra maatũũrire bũrũri ũcio.
13. Na gũgĩkinya atĩrĩ, atĩ hĩndĩ ĩrĩa ciana cia Isiraeli ciagĩire na hinya mũno makĩria, ikaheaga Akanaani acio mawĩra ma hinya o ta ũrĩa ciamaathaga, na itiigana kũmaingata biũ.
14. Nacio ciana cia Jusufu ikĩarĩria Joshua, ikĩmwĩra atĩrĩ, Nĩ kĩ gĩtũmĩte ũ’he niĩ o igai rĩmwe riiki, o na gĩcunjĩ o ro kĩmwe giiki, kuona atĩ ndĩkĩrĩ mũhĩrĩga mũnene nĩ ũndũ wa ũrĩa Jehova atũire atũrathimaga nginya o rĩu?
15. Nake Joshua agĩciĩra atĩrĩ, Ũngĩkorũo wĩ mũhĩrĩga mũnene, na gũtuĩke atĩ bũrũri ũcio wĩ irĩma nyingĩ wa Efiraimu ndũgũkũigana nĩ ũndũ wa ũrĩa ũcekehete-rĩ, ndũkĩambate ũthiĩ kũrĩa mũtitũ-inĩ, ũkeyunĩre kĩrĩti wee mwene bũrũri wa Aperizi, o na Arefaimu.
16. Nacio ciana icio cia Jusufu igĩkiuga atĩrĩ, Bũrũri ũcio wĩ irĩma nyingĩ ndũgũtũigana; ningĩ Akanaani othe arĩa matũũraga bũrũri wa ituamba-inĩ, me na ngari cia ita cia igera, o acio marĩ Bethi-sheani, na matũũra marĩo, o na arĩa marĩ gĩtuamba-inĩ kĩa Jezireeli.
17. Joshua agĩkĩaria na andũ acio a nyũmba ya Jusufu, nao nĩo Efiraimu na Manase, akĩmera atĩrĩ, Wee wĩ mũhĩrĩga mũnene, na wĩ na hinya mũno; ndũngĩheo igai o rĩmwe riiki;
18. no rĩrĩ, bũrũri ũcio wĩ irĩma nyingĩ noguo ũgũtuĩka waku; nĩ gũkorũo o na watuĩka nĩ wa mũtitũ, nĩũkũwĩyunĩra kĩrĩti kĩu; na kũrĩa guothe warũma gũgũtuĩka o gwaku; tondũ atĩrĩ, o na harĩa Akanaani acio me na ngari cia igera, o na makagĩa na hinya mũno, nĩũkamaingata.