Go Back

Joshua Chapter 2

• 1. Nake Joshua wa Nuni akĩrekia andũ erĩ na hitho, moime kũu Shitimu, nĩ getha magathigane bũrũri; agĩkĩmera atĩrĩ, Thiĩi mũgatuĩrie bũrũri ũcio wothe wega, o na Jeriko. Nao magĩgĩthiĩ, magĩkinya nyũmba ya mũka wa maraya wetagwo Rahabu, makĩraarĩrĩra kuo.
• 2. Naguo ũhoro ũcio ũkĩheo mũthamaki wa Jeriko, akĩĩrũo atĩrĩ, Nĩgũũkĩte andũ a ciana cia Isiraeli magatonya gũkũ ũtukũ nĩ getha matuĩrie ũrĩa bũrũri ũyũ ũtariĩ.
• 3. Nake mũthamaki ũcio akĩrekania harĩ Rahabu, akĩmwĩra atĩrĩ, Andũ acio mokire gwaku nyũmba, marutithie na nja; nĩ ũndũ mokĩte gũthigana bũrũri ũyũ wothe.
• 4. No rĩrĩ, mũka ũcio akĩoya andũ acio erĩ, akĩmahitha, agĩcoka akiuga atĩrĩ, Ĩĩ, ti-itherũ andũ acio nĩmegũũkĩte gwakwa; no rĩrĩ, ndinamenya kũrĩa mekuumĩte nakuo;
• 5. na gwakinya atĩrĩ, atĩ ta ihinda rĩrĩa mũrango wa itũũra ũhingagwo, o gwatuka, andũ acio maacoka kuuma; na rĩu ndikĩmenya kũrĩa mathiire; marũmĩrĩrei na ihenya, na nĩmũkũmakinyĩra.
• 6. No rĩrĩ, nĩ gũtwara aamatwarĩte akamahaicia handũ nyũmba igũrũ, akamahitha na ũguta ũrĩa aarĩte hau igũrũ rĩa nyũmba.
• 7. Nao acio maamacaragia makĩmarũmĩrĩra na njĩra ĩrĩa ĩthiaga Jorodani, o nginya magĩkinya mariũko-inĩ maruo; na rĩrĩ, hĩndĩ ĩrĩa acio maamarũmĩrĩire maakorirũo moimĩte na nja, mũrango ũcio wa itũũra ũgĩcoka ũkĩhingwo o narua.
• 8. Nao andũ acio erĩ matanakoma-rĩ, mũtumia ũcio akĩhaica agĩthiĩ harĩ o, hau nyũmba igũrũ;
• 9. agĩkĩmera atĩrĩ, Nĩnjũĩ atĩ Jehova nĩamũheete bũrũri ũyũ, na ithuĩ tũgatebeba nĩ ũndũ wanyu, nao andũ othe arĩa matũũraga bũrũri ũyũ makaiyũrũo nĩ maĩ nda nĩ ũndũ wanyu.
• 10. Nĩ ũndũ nĩtũiguĩte ũrĩa Jehova aahũithirie maĩ ma Iria Itune mbere yanyu, hĩndĩ ĩrĩa mwoimire Misiri; o na ũrĩa mwekire athamaki arĩa erĩ a Amoabi, o acio maarĩ mũrĩmo ũcio ũngĩ wa Jorodani, nao nĩo Sihoni, o na Ogu, acio mwaninire o kũnina biũ.
• 11. Ithuĩ na ithuĩ-rĩ, o ro ihinda rĩrĩa twaiguire ũhoro ũcio, ngoro ciitũ ikĩringĩka, nacio ngoro cia andũ othe, mũndũ o mũndũ, ikĩũrũo nĩ hinya nĩ ũndũ wanyu; nĩ ũndũ Jehova Ngai wanyu nĩwe Ngai wa kũrĩa igũrũ, o na wa gũkũ thĩ.
• 12. Tondũ ũcio rĩu ndamũthaitha mwĩhĩtĩre mbere ya Jehova mũnjĩre atĩ nĩmũgateithia nyũmba ya baba mũmĩĩke wega, kuona atĩ nĩ niĩ ndĩmũteithĩtie ngamwĩka wega na mũnyonie ũndũ ũcio na kĩmenyithia kĩa ma,
• 13. gĩa atĩ nĩmũkahonokia baba, na maitũ, o na ariũ a baba, na airĩtu ake, o na kĩrĩa gĩothe me nakĩo, mũtũhonokie tũtikoragwo.
• 14. Nao andũ acio magĩkĩĩra mũtumia ũcio atĩrĩ, Ithuĩ tũrokua mũngĩkaaga kũhonokio mũtũũre muoyo, kũngĩkorũo mũtitumũka mwarie ũhoro witũ ũyũ twĩ naguo gũkũ; na nĩgũgatuĩka atĩrĩ, atĩ hĩndĩ ĩrĩa Jehova agatũhe bũrũri ũyũ, nĩtũgagũteithia, tũgwĩke maũndũ mega na ma kĩhooto.
• 15. Hĩndĩ ĩo akĩmaagararia moimĩre ndirica-inĩ na mũhĩndo nĩ ũndũ nyũmba yake yarĩ rũthingo-inĩ rũa itũũra rĩu, nake aatũũraga o rũthingo-inĩ rũu igũrũ.
• 16. Nake agĩkĩmera atĩrĩ, Wĩthiĩrei kũrĩa irĩma-inĩ, nĩ getha hihi acio mamũrũmĩrĩire matikamũkore, mwĩhithe kuo mĩthenya ĩtatũ, o nginya hĩndĩ ĩrĩa acio mamũrũmĩrĩire magakorũo macokete; na thutha wa ũguo mũgacoka mwĩthiĩre.
• 17. Nao andũ acio makĩĩra mũtumia ũcio atĩrĩ, Ithuĩ tũtigacokererũo nĩ ũũru nĩ ũndũ wa mwĩhĩtwa waku ũcio ũtwĩhĩtithĩtie, ũngĩgeka ũũ,
• 18. atĩrĩrĩ, hĩndĩ ĩrĩa tũgoka bũrũri ũyũ, nĩũkoherera rũrigi rũrũ rũtune ndirica-inĩ ĩrĩa watwagararĩirie; na ũkongania aa thoguo, na nyũkwa, na ariũ a thoguo, o na andũ othe arĩa matũũraga gwa thoguo, ũmarehe gũkũ gwaku nyũmba.
• 19. Na nĩgũgatuĩka atĩrĩ, atĩ mũndũ ũrĩa wothe ũkahĩtũka oime mũrango-inĩ wa nyũmba yaku athiĩ njĩra-inĩ-rĩ, thakame yake nĩwe mwene ũgacokererũo nĩyo, no ithuĩ tũtigacokererũo nĩ ũũru nĩ ũndũ wake; no rĩrĩ, mũndũ o wothe ũrĩa ũgakorũo arĩ hamwe nawe nyũmba thĩinĩ, angĩgekwo ũũru nĩ guoko kwa mũndũ o na ũrĩkũ, thakame yake nĩ ithuĩ tũgacokererũo nĩyo.
• 20. No rĩrĩ, ũngĩtumũka warie ũhoro witũ ũyũ twĩ naguo gũkũ-rĩ, ithuĩ tũtigacokererũo nĩ ũũru ũkoniĩ mwĩhĩtwa waku ũrĩa ũtwĩhĩtithĩtie.
• 21. Nake akiuga atĩrĩ, O ta ũguo ũhoro ũcio mwoiga ũtariĩ-rĩ, kũrotuĩka o ta ũguo. Nake agĩkĩmareka mathiĩ, nao magĩgĩĩthiĩra; agĩcoka akĩoherera rũrigi rũu rũtune ndirica-inĩ.
• 22. Nao magĩgĩthiĩ magĩkinya kĩrĩma-inĩ, magĩikara kuo mĩthenya ĩtatũ, o nginya hĩndĩ ĩrĩa acio maamarũmĩrĩire maahũndũkire; nao andũ acio maamarũmĩrĩire makĩmacaria njĩra-inĩ guothe kũrĩa maagereire, na matiigana kũmona.
• 23. Thutha wa ũguo andũ acio erĩ makĩhũndũka, magĩikũrũka moimĩte hau kĩrĩma-inĩ, makĩringa Jorodani, magĩkinya he Joshua wa Nuni, makĩmũhe ũhoro wothe wa maũndũ marĩa maamakorete.
• 24. Nao magĩkĩĩra Joshua atĩrĩ, Ti-itherũ Jehova nĩatũheete bũrũri ũcio wothe, akawĩkĩra moko-inĩ maitũ; nao andũ othe a bũrũri ũcio nĩmaiyũrĩtwo nĩ maĩ nda nĩ ũndũ witũ.

Home