1. ŨYŨ nĩguo Ũguũria wa Jesu Kristo, wa maũndũ, ũrĩa aaheirũo nĩ Ngai nĩguo onie ndungata ciake maũndũ marĩa matarĩ hingo matagakinya narua; nake akĩũtũma na mũraika wake akĩũmenyithia ndungata yake Johana,
2. ũrĩa nake wacokire kuumbũra Ũhoro ũcio wa Ngai, o na ũira wa Jesu Kristo, agĩkiumbũra maũndũ mothe marĩa onire.
3. Gũkena-rĩ, nĩ ũrĩa ũgũthoma o na arĩa mekũigua ciugo cia ũrathi ũyũ, na makamenyerera maũndũ marĩa maandĩkĩtwo ho; amu ihinda nĩrĩkuhĩhĩirie.
4. Ũhoro ũyũ nĩ Johana watũmĩra makanitha marĩa mũgwanja me bũrũri wa Asia: Atĩrĩrĩ, Wega ũrogĩa harĩ inyuĩ, o na thayũ, ciumĩte kwĩ ũrĩa ũrĩ ho, na nowe warĩ ho, na nowe ũgũũka, na ikoima kũrĩ Maroho marĩa mũgwanja me mbere-inĩ ya gĩtĩ gĩake gĩa ũthamaki;
5. na kũrĩ Jesu Kristo, mũira ũrĩa mwĩhokeku, o we irigithathi rĩa arĩa akuũ, na nowe mwathi wa athamaki a thĩ. O we ũcio ũtwenda, na watuohorire na thakame yake tuume mehia-inĩ maitũ,
6. na agĩtũtua kĩrĩndĩ kĩa mũthamaki, tũtuĩke athĩnjĩri Ngai wake, o we Ithe-rĩ, ũgoocwo na wathani irogĩaga kũrĩ we nginya tene na tene. Amen.
7. Atĩrĩrĩi, nĩ gũũka egũũka na matu; na gũtirĩ riitho rĩtakamuona, o na arĩa maamũthecire o nao mamuone; na ndũrĩrĩ ciothe cia thĩ nĩ gũcakaya igacakaya nĩ ũndũ wake. Noguo gũgatuĩka, Amen.
8. Nĩ niĩ Alifa o na Omega,
nĩguo Mwathani Ngai ekuuga, ũrĩa ũrĩ ho, na nowe warĩ ho, na nowe ũgũũka, o we Mwene-Hinya-Wothe.
9. Atĩrĩrĩ, niĩ Johana, mũrũ wa ithe wanyu na mũgwatanĩri na inyuĩ mĩnyamaro na ũthamaki na ũkirĩrĩria, iria ii na Jesu, ndakorirũo ndĩ gĩthama kĩrĩa gĩĩtagwo Patimo nĩ ũndũ wa Ũhoro wa Ngai na ũira wa Jesu.
10. Ngĩkorũo ndĩ thĩinĩ wa Roho mũthenya wa Mwathani, na ngĩigua mũgambo mũnene na thutha wakwa, o ta wa coro,
11. ũkiuga atĩrĩ, Ũrĩa ũkuona-rĩ, andĩka mbuku-inĩ, ũcoke ũtũmĩre makanitha marĩa mũgwanja: wa Efeso, na wa Simurina, na wa Perigamo, na wa Thuatira, na wa Saride, na wa Filadelfia, na wa Laodikia.
12. Ngĩkĩĩhũgũra nyone mũgambo ũcio wanjarĩria. Ndehũgũra, ngĩona mĩtĩ mũgwanja ya kũhangĩrũo matawa, ya thahabu;
13. na mĩtĩ-inĩ ĩo ya kũhangĩrũo matawa gatagatĩ ngĩona kũrĩ wĩ ho ahaana ta mũrũ wa mũndũ, ekĩrĩte nguo ĩmũkinyĩte o nyarĩrĩ, na akeoha mũcibi wa thahabu gĩthũri-inĩ.
14. Na mũtwe wake na njuĩrĩ yake cierũhĩte ta guoya wa ng’ondu ũrĩa mwerũ cua, ikerũha o ta ira; namo maitho make maahuanaga ta rũrĩrĩmbĩ rũa mwaki;
15. nacio nyarĩrĩ ciake ikahaana ta gĩcango kĩrĩa gĩthũe mũno, gĩgathera ta kĩrahĩa gĩĩ thĩinĩ wa nyũngũ ya ũturi; na mũgambo wake watariĩ ta mũrurumo wa maĩ maingĩ.
16. Ningĩ guoko gwake kwa ũrĩo nĩaagwete njata mũgwanja, na kanua gake gakoima rũhiũ rũũgĩ, rũnore mĩena yerĩ: naguo ũthiũ wake watariĩ ta riũa rĩrĩa rĩarĩte o kwara.
17. Ndamuona, ngĩgũa magũrũ-inĩ make ngĩikara ta mũndũ mũkuũ. Nake akĩnjigĩrĩra guoko kwa ũrĩo, akiuga, Tiga gwĩtigĩra; nĩ niĩ wa mbere o na wa kũrigĩrĩria,
18. nĩ niĩ Ũrĩa-wĩ-muoyo; na nĩndakuĩte, na nĩ niĩ ũyũ, ngũtũũra muoyo kinya o tene na tene, nacio ihingũro nĩ niĩ ndĩ nacio cia gĩkuũ na cia kwa-ngoma.
19. Hakĩrĩ ũguo-rĩ, kĩandĩke maũndũ macio wona, o namo maũndũ marĩa me kuo rĩu, na marĩa magakinya thutha;
20. na ũhoro wa kĩriga kĩu kĩa njata mũgwanja, icio wona guoko gwakwa kwa ũrĩo, na kĩa mĩtĩ ĩo mũgwanja ya thahabu ya kũhangĩrũo matawa. Njata icio mũgwanja nĩcio araika a makanitha marĩa mũgwanja, nayo mĩtĩ ĩo mũgwanja ya kũhangĩrũo matawa nĩyo makanitha mũgwanja.