Go Back

Kũguũrĩrio Chapter 3

• 1. NAKE mũraika wa kanitha ũrĩa ũrĩ Saride mwandĩkĩre atĩrĩ: Ũguo nĩguo oiga ũrĩa wĩ na Maroho marĩa mũgwanja ma Ngai, o na njata iria mũgwanja, atĩrĩ, Nĩnjũĩ ciĩko ciaku, ngamenya wĩ na igweta atĩ wĩ muoyo, na nĩ gũkua ũkuĩte.
• 2. Arahũka, ũrũmie maũndũ marĩa matigaire, marĩa marenda gũkua, amu ciĩko ciaku gũtirĩ nyonete ii nginyanĩru harĩ Ngai wakwa.
• 3. No kĩririkane ũrĩa waheirũo, na ũrĩa waiguire; na ũrũmie ũhoro ũcio, wĩrire. Wakĩrega kwarahũka-rĩ, nĩngoka ta mũici, na ndũmenye thaa ĩrĩa ngagũkorerera.
• 4. No rĩrĩ, nĩũrĩ na marĩĩtwa mamwe matarĩ maingĩ kũu Saride ma arĩa mataigana kũgwatia nguo ciao gĩko; nao nĩmagatwaranaga hamwe na niĩ meguĩkĩte nguo njerũ, tondũ o nĩo maagĩrĩirũo.
• 5. Ũrĩa wa gũtorania-rĩ, agakĩhumbwo nguo icio njerũ; na ndirĩ hĩndĩ ngatharia rĩĩtwa rĩake rĩthenge thĩinĩ wa ibuku rĩrĩa rĩa muoyo, na nĩngetĩkĩra rĩĩtwa rĩake harĩ Awa, na harĩ araika ake.
• 6. Ũrĩa ũrĩ gũtũ, nĩakĩigue ũrĩa Roho arera makanitha.
• 7. Nake mũraika wa kanitha ũrĩa ũrĩ Filadelfia mwandĩkĩre atĩrĩ: Ũguo nĩguo oiga ũrĩa mũtheru, o ũrĩa wa ma, ũrĩa wĩ na kĩhingũro kĩrĩa kĩa Daudi, ũrĩa ũhingũraga na gũkaaga wa gũkahinga, ningĩ akahinga na gũkaaga ũngĩhingũra; atĩrĩ,
• 8. Nĩnjũĩ ciĩko ciaku. Atĩrĩrĩ, nĩnjĩkĩrĩte mũrango mũhingũre mbere yaku, ũtarĩ ũngĩhota kũũhinga; nĩnjũĩ wĩ na hinya hanini, na nĩũtũire ũmenyereire uuge wakwa, na ndũigana gũkaana rĩĩtwa rĩakwa.
• 9. Atĩrĩ, nĩngũkũhe amwe arĩa a thunagogi ya Shaitani, arĩa moigaga nĩ Ayahudi, na tio, nĩ kũhenania mahenanagia; atĩrĩ, nĩngatũma moke mainamĩrĩre mbere ya magũrũ-inĩ maku, na mamenye atĩ niĩ nĩngwendete.
• 10. Tondũ wee nĩũtũire ũmenyereire uuge ũrĩa wakwa wa ũkirĩrĩria-rĩ, niĩ na niĩ nĩngagũikaria ihinda rĩrĩa rĩa kũgerio, rĩrĩa rĩgoka mabũrũri mothe rĩgerie arĩa matũire gũkũ thĩ.
• 11. Nĩngũũka o narua; gwatagĩria maũndũ marĩa wĩ namo, mũndũ o na ũrĩkũ ndakanae gũthiĩ na thũmbĩ yaku.
• 12. Ũrĩa wa gũtorania-rĩ, nĩngamũtua gĩtugĩ kĩa hekarũ ya Ngai wakwa, na ndarĩ hingo agacoka kuuma kuo, o na rĩ; na nĩngamwandĩka rĩĩtwa rĩa Ngai wakwa, o na rĩĩtwa rĩa itũũra rĩa Ngai wakwa, nĩkuo Jerusalemu ĩrĩa njerũ, ĩrĩa ya kuuma Igũrũ kwĩ Ngai wakwa, o na ndĩmwandĩke rĩĩtwa rĩakwa mwene rĩrĩa rĩerũ.
• 13. Ũrĩa ũrĩ gũtũ, nĩakĩigue ũrĩa Roho arera makanitha.
• 14. Nake mũraika wa kanitha ũrĩa ũrĩ Laodikia mwandĩkĩre atĩrĩ: Ũguo nĩguo oiga we Amen, o we mũira ũrĩa mwĩhokeku na ũrĩa wa ma, ũrĩa mwambĩrĩria wa ũũmbi wa Ngai, atĩrĩ,
• 15. Nĩnjũĩ ciĩko ciaku, ngamenya ndũrĩ heho na ndũrĩ mwaki. Kaba ũgĩe heho kana ũgĩe mwaki!
• 16. No tondũ ũkĩrĩ mũraru, ũkaaga kũhiũha na ũkaaga kũhora-rĩ, ngũgũtua thĩ ũthire kanua gakwa.
• 17. Tondũ uugaga atĩrĩ, Niĩ ndĩ gĩtonga, ngagĩa na indo, na ndirĩ kĩndũ njagĩte; na ndũũĩ atĩ wee nĩwe mũthĩnĩki, na wĩ mũmocu na wĩ mũkĩa na wĩ mũtumumu na wĩ njaga;
• 18. tondũ ũcio ngũgũtaara atĩrĩ, atĩ ũgũre thahabu kũrĩ niĩ, ũrĩa mũtherie na mwaki, nĩguo ũtonge; na ũgũre nguo iria njerũ, nĩguo wĩhumbe, thoni ciaku cia gũikara njaga itige kuonekana; o na ũgũre mũthaiga wa maitho, wĩhake maitho, nĩguo wonage.
• 19. O arĩa othe nyenda, nĩndĩmarũithagia na ngamaherithia; tondũ ũcio no kĩgĩe na kĩyo, wĩrire.
• 20. Atĩrĩrĩ, nũngiĩ mũrango-inĩ ngĩũringaringa, mũndũ aaigua mũgambo wakwa na aahingũra mũrango, nĩngũtonya harĩ we, ndĩanĩre irio nake, nake arĩanĩre na niĩ.
• 21. Ũrĩa wa gũtorania-rĩ, we nĩngamwĩtĩkĩria aikarĩre gĩtĩ gĩakwa gĩa ũthamaki hamwe na niĩ, o ta ũrĩa niĩ na niĩ ndatoranirie, na ngĩikaranĩra hamwe na Awa gĩtĩ gĩake gĩa ũthamaki.
• 22. Ũrĩa ũrĩ gũtũ, nĩakĩigue ũrĩa Roho arera makanitha.

Home