Go Back

Ruthu Chapter 3

• 1. Nake Naomi, ũcio nyaciarawe, agĩkĩmwĩra atĩrĩ, Mwarĩ wakwa, githĩ hihi ti wega ngũcarĩrie handũ ha gũikara ũhoreire nĩ getha wonage wega?
• 2. Na rĩrĩ, Boazu ũcio wa nyũmba iitũ, o ũcio mwarĩ na ndungata ciake cia airĩtu-rĩ, githĩ tiwe witũ? Atĩrĩrĩ, ũtukũ ũyũ nĩguo ekũhũrĩra cairi kĩhuhĩro-inĩ.
• 3. Tondũ ũcio wĩthambe, na wĩhake maguta, wĩhumbe nguo ciaku, ũcoke ũikũrũke ũkinye kĩhuhĩro-inĩ; no ndũkeonithie mũndũ ũcio o nginya aambe arĩe o na anyue.
• 4. Na gũgatuĩka atĩrĩ, atĩ hĩndĩ ĩrĩa arĩthiĩ gũkoma-rĩ, ũbare mũno handũ harĩa arĩkoma, nawe ũgĩcoke ũthiĩ ho, ũmũguũrie magũrũ ũkome hau thĩ; nake nĩegũkwĩra ũrĩa wagĩrĩirũo nĩ gwĩka.
• 5. Nake Ruthu agĩkĩĩra nyaciarawe atĩrĩ, Maũndũ macio mothe wanjĩra, nomo ngwĩka.
• 6. Nake agĩgĩikũrũka agĩkinya kĩhuhĩro-inĩ kĩu, agĩgĩĩka o ta ũguo nyaciarawe aamwĩrĩte eke.
• 7. Nake Boazu aarĩkia kũrĩa na kũnyua, o na akĩigua na ngoro ta akenete-rĩ, agĩthiĩ gũkoma mũthia-inĩ wa hĩba ya cairi; nake Ruthu agĩthiĩ na njemo, akĩmũguũria magũrũ agĩĩkomia hau thĩ.
• 8. Na gũgĩkinya atĩrĩ, atĩ o ũtukũ gatagatĩ, Boazu akĩigua moyoyo, akĩĩgarũra; na atĩrĩrĩ, agĩkora nĩ mũndũ-wa-nja ũkomete magũrũ-inĩ make.
• 9. Nake agĩkĩmũũria atĩrĩ, Nĩwe ũ? Nake agĩcokia atĩrĩ, Nĩ niĩ Ruthu ndungata yaku ya mũirĩtu; tambũrũkia mũthia wa nguo yaku ũhumbĩre ndungata yaku ya mũirĩtu; nĩ ũndũ wee nĩwe ũmwe wa arĩa mangĩtũthambia.
• 10. Nake agĩkiuga atĩrĩ, Mwarĩ wakwa, Jehova arokũrathima! Wee nĩwonanĩtie maũndũ maingĩ ma ũtugi o hĩndĩ ĩno ya kũrigĩrĩria, gũkĩra marĩa wonanirie kĩambĩrĩria-inĩ, nĩ ũndũ ndũnenda kũrũmanĩrĩra na aanake, o na marĩ ngĩa kana marĩ itonga.
• 11. Na rĩrĩ, mwarĩ wakwa, menya wĩtigĩre; nĩngũgwĩka o ta ũrĩa maũndũ mothe marĩa uugĩte matariĩ; nĩ ũndũ andũ othe a itũũra rĩrĩ riitũ nĩmoĩ atĩ wĩ mũndũ-wa-nja mũthingu mũno.
• 12. Na rĩrĩ, ti-itherũ nĩ niĩ ũmwe wa arĩa mangĩgũthambia, no nĩharĩ mũndũ ũngĩ ũngĩagĩrĩrũo nĩ gũgũthambia gũkĩra niĩ.
• 13. Tondũ ũcio kĩraare ũtukũ ũyũ, na nĩgũgakinya atĩrĩ, atĩ rũciũ rũcinĩ mũndũ ũcio angĩgetĩkĩra gũgũthambia-rĩ, nĩagũthambie; no angĩkarega gũgũthambia, hĩndĩ ĩo, o ro ta ũrĩa Jehova atũũraga muoyo, nĩ niĩ ngagũthambia; rĩu kĩraare nginya o rũciũ rũcinĩ.
• 14. Nake Ruthu agĩkoma hau magũrũ-inĩ make nginya o rũcinĩ; akĩroka gũũkĩra rũcinĩ tene kwĩ mairia. Nĩ ũndũ Boazu oigire atĩrĩ, Gũtikamenyeke atĩ mũndũ-wa-nja ũcio nĩokĩte kĩhuhĩro-inĩ.
• 15. Nake agĩkiuga atĩrĩ, Ta rehe nguo ĩo yaku njariĩ wĩhumbĩte nayo, wanĩrĩrie; nake akĩmĩanĩrĩria; nake Boazu agĩthima ibaba ithathatũ cia cairi, akĩmũigĩrĩra; agĩcoka agĩthiĩ agĩtonya itũũra.
• 16. Na rĩrĩa Ruthu aakinyire kwĩ nyaciarawe, nyaciarawe akĩmũũria atĩrĩ, Mwarĩ wakwa, ũhoro wagũa atĩa? Nake agĩkĩmwĩra maũndũ mothe marĩa mũndũ ũcio aamwĩkĩte.
• 17. Nake Ruthu agĩgĩcoka akiuga atĩrĩ, Ibaba ici ithathatũ cia cairi nĩwe wa’he, nĩ ũndũ oigire atĩrĩ, Tiga kũinũkĩra nyaciaraguo moko matheri.
• 18. Hĩndĩ ĩo nyaciarawe agĩkiuga atĩrĩ, Ikara o ro ũguo wĩkirĩire, mwarĩ wakwa, o nginya hĩndĩ ĩrĩa ũrĩmenya ũrĩa ũhoro ũcio ũrĩgũa; nĩ gũkorũo mũndũ ũcio ndangĩhurũka o nginya rĩrĩa arĩnina ũhoro ũcio o ro ũmũthĩ.

Home