Go Back

1 Samueli Chapter 15

• 1. Ningĩ Samueli agĩkĩĩra Saulu atĩrĩ, Jehova aandekirie ngũitĩrĩrie maguta ũtuĩke mũthamaki, ũthamakagĩre andũ ake, nao nĩo Aisiraeli; tondũ ũcio thikĩrĩria uuge wa ndũmĩrĩri ya Jehova.
• 2. Jehova Mũnene wa Ita ekuuga ũũ: Nĩndĩraririkana maũndũ marĩa Amaleki ekire Isiraeli, ũrĩa aaikarire njĩra-inĩ amuoherie rĩrĩa aambataga oimĩte Misiri.
• 3. Rĩu gĩthiĩ ũkahũre Aamaleki, na ũnine o kũnina biũ kĩrĩa gĩothe me nakĩo, na ndũkamacaĩre; no rĩrĩ, ũraga mũndũ mũrũme, na mũndũ-wa-nja, na rũkenge, na kaana karĩa gekuonga, na ng’ombe, na mbũri, na ngamĩra, o na ndigiri.
• 4. Hĩndĩ ĩo Saulu agĩgĩĩta andũ ake, akĩmatarĩra Telaimu, nao magĩkorũo me ngiri magana merĩ ma andũ arĩa metwaraga na magũrũ, na ngiri ikĩmi cia andũ a Juda.
• 5. Saulu agĩgĩkinya itũũra rĩa Amaleki, agĩikara oheirie andũ kĩanda-inĩ.
• 6. Nake Saulu agĩkĩĩra Akeni atĩrĩ, Ikũrũkai mũthiĩ muume gũkũ, mweherere Aamaleki, ndikamũninanĩrie nao; nĩ ũndũ nĩmwekire ciana ciothe cia Isiraeli maũndũ mega rĩrĩa ciaambataga ciumĩte Misiri. Tondũ ũcio Akeni makĩĩeherera makiuma harĩ Aamaleki.
• 7. Nake Saulu agĩkĩhũra Aamaleki, amarutĩtie Havila, akĩmakinyia Shuri, kũrĩa kũringaine na Misiri.
• 8. Agĩkĩnyita Agagi, mũthamaki wa Aamaleki, arĩ muoyo, nao andũ arĩa angĩ othe agĩkĩmanina o kũmanina biũ na hiũ cia njora.
• 9. No rĩrĩ, Saulu na andũ ake makĩhonokia Agagi, o na ndũrũme imwe, na ndegwa iria ciarĩ njega mũno, na ngoima, na tũtũrũme, na indo ciothe iria ciarĩ njega, makĩaga gũcinina; no indo ciothe iria ciarĩ thũku, na iria itangĩendeka, icio nĩmaacininire o gũcinina biũ.
• 10. Hĩndĩ ĩo ndũmĩrĩri ya Jehova ĩgĩgĩkinyĩrĩra Samueli, akĩĩrũo atĩrĩ,
• 11. Nĩngwĩrira nĩ kwarahũra Saulu atuĩke mũthamaki; nĩ ũndũ nĩacokete na thutha, agatiga kũnũmĩrĩra, na akaaga kũhingia maathani makwa. Nake Samueli agĩkĩigua ũũru mũno, akĩraara agĩkaĩra Jehova ũtukũ ũcio wothe.
• 12. Ningĩ Samueli agĩkĩroka gũũkĩra tene agatũnge Saulu kũrĩ o rũcinĩ; nake Samueli akĩheo ũhoro, akĩĩrũo atĩrĩ, Saulu nĩaathiĩte Karimeli, na atĩrĩrĩ, nĩehandĩire inyamũ rĩa gũtũma aririkanagwo, na rĩu nĩ mũgarũrũku agethiĩra, agaikũrũka akinye Giligali.
• 13. Samueli agĩgĩkinya he Saulu, nake Saulu akĩmwĩra atĩrĩ, Jehova arokũrathima! Nĩ’hingĩtie watho wa Jehova.
• 14. Samueli agĩkiuga atĩrĩ, Kaĩ mwananĩrio ũcio wĩ matũ-inĩ makwa wa ndũrũme ũkĩrĩ wa kĩ, o na mwananĩrio wa ng’ombe ũcio ndĩrakĩigua?
• 15. Nake Saulu agĩkiuga atĩrĩ, Nĩ kũruta macirutĩte kwa Aamaleki; nĩ ũndũ andũ nĩmaatigirie ndũrũme na ndegwa iria njega mũno, cia kũrutĩra Jehova Ngai waku magongona; no iria ingĩ nĩtwacininire biũ.
• 16. Samueli agĩkĩĩra Saulu atĩrĩ, Ta rũgama ngwĩre ũrĩa Jehova anjĩrĩte ũtukũ ũyũ. Nake akĩmwĩra atĩrĩ, Ta no kiuge.
• 17. Nake Samueli agĩkiuga atĩrĩ, O na harĩa o nawe weyonaga wĩ mũnyinyi-rĩ, githĩ ndwagĩtuirũo mũnene wa mĩhĩrĩga ya Isiraeli? Nake Jehova agĩgũitĩrĩrithia maguta ũtuĩke mũthamaki, ũthamakagĩre Isiraeli;
• 18. ningĩ Jehova agĩkũrekia ũthiĩ rũgendo, agĩkwĩra atĩrĩ, Thiĩ ũkanine ehia acio, ti Aamaleki, ũhũrane nao o nginya maninwo biũ.
• 19. Rĩu-rĩ, nĩ kĩ gĩakĩgiririe wathĩkĩre uuge wa Jehova, no ũkĩrũũgĩrĩra indo gũcitaha, ũgĩĩka ũndũ ũrĩa wonagwo wĩ mũũru nĩ Jehova?
• 20. Nake Saulu agĩkĩĩra Samueli atĩrĩ, Aca, ti-itherũ nĩnjathĩkĩire uuge wa Jehova, na nĩngereire o njĩra ĩrĩa Jehova aandwarĩire, na nĩndehithĩtie Agagi, mũthamaki wa Aamaleki, na nganina Aamaleki o kũmanina biũ.
• 21. No rĩrĩ, nĩ andũ aitũ maathiire na indo imwe iria ciatahĩtwo, ng’ondu na ng’ombe, nacio nĩ iria njega mũno thĩinĩ wa icio ciaamũrĩtwo cia kũninwo, cia kũrutĩra Jehova Ngai waku magongona gũkũ Giligali.
• 22. Samueli agĩkiuga atĩrĩ, Anga Jehova akenagio mũno nĩ mahaki ma njino na magongona ta ũrĩa akenagio nĩ gwathĩkĩra uuge wa Jehova? Atĩrĩrĩ, gwathĩkĩra Jehova nĩkuo kwega gũkĩra magongona, na kũmũigua gũgakĩra maguta ma ndũrũme.
• 23. Nĩ ũndũ-rĩ, ũremi ũhaana ta wĩhia wa kũragũranĩra, nakuo kwaga gwathĩka nĩ ta waganu, o na kana kũhoya mĩhianano. Rĩu-rĩ, tondũ nĩũregete uuge wa Jehova-rĩ, o nake nĩaakũrega ũtuĩke mũthamaki.
• 24. Saulu agĩkĩĩra Samueli atĩrĩ, Nĩnjĩhĩtie, nĩ ũndũ nĩnjagararĩte rĩathani rĩa Jehova, o na ũhoro waku, nĩ ũndũ nĩndetigĩrire andũ, ngĩigua uuge wao.
• 25. Tondũ ũcio rĩu ndagũthaitha ũnjohere wĩhia wakwa, tũcokanie nawe, nĩguo ngainamĩrĩre ’hoe Jehova.
• 26. Nake Samueli agĩkĩĩra Saulu atĩrĩ, Ndingĩcokania nawe; nĩ ũndũ nĩũregete uuge wa Jehova, nake Jehova nĩakũregete ũtuĩke mũthamaki wa gũthamakĩra Isiraeli.
• 27. Na rĩrĩa Samueli aagarũrũkaga ethiĩre-rĩ, Saulu akĩnyita gĩcora kĩa nguo ya Samueli, ĩgĩtembũka.
• 28. Nake Samueli agĩkĩmwĩra atĩrĩ, Jehova nĩaatembũra ũthamaki wa Isiraeli aagũtunya ũmũthĩ, na nĩaaũhe mũndũ ũngĩ wanyu mwega gũgũkĩra.
• 29. Ningĩ-rĩ, we ũrĩa wĩtagwo Hinya-wa-Isiraeli ndarĩ hingo angĩhenania, kana ericũkwo, nĩ ũndũ we ti mũndũ atĩ nĩguo ericũkwo.
• 30. Nake Saulu agĩcoka akiuga atĩrĩ, Nĩnjĩhĩtie; no rĩrĩ, ta ’he gĩtĩo rĩu ndĩ haha, mbere ya athuri aya a andũ akwa, o na mbere ya Isiraeli, wĩtĩkĩre tũcokanie, nĩguo ngainamĩrĩre ’hoe Jehova Ngai waku.
• 31. Samueli magĩgĩcokania na Saulu, nake Saulu akĩinamĩrĩra akĩhoya Jehova.
• 32. Ningĩ Samueli agĩkiuga atĩrĩ, Ta ndeherei Agagi, mũthamaki wa Aamaleki, o haha ndĩ. Nake Agagi agĩthiĩ harĩ we akenete. Agagi agĩkiuga atĩrĩ, Ti-itherũ ruo rũa gĩkuũ nĩ rũthengu.
• 33. Nake Samueli akiuga atĩrĩ, O ta ũrĩa rũhiũ rũaku rũa njora rũanatũma andũ-a-nja morũo nĩ ciana-rĩ, ũguo noguo nyũkwa egũikara thĩinĩ wa andũ-a-nja arĩa angĩ atarĩ na mwana. Samueli agĩgĩtinangĩria Agagi o kũu Giligali mbere ya Jehova.
• 34. Thutha ũcio Samueli agĩgĩĩthiĩra Rama; nake Saulu agĩkĩambata akĩinũka gwake mũciĩ, o kũu Gibea, itũũra rĩa Saulu.
• 35. Nake Samueli ndakĩigana gũcoka gũthiĩ kuonana na Saulu, o na nginya mũthenya ũrĩa aakuire, nĩ ũndũ Samueli nĩaarĩragĩra Saulu; nake Jehova agĩkĩĩrira nĩ ũndũ wa gũtua Saulu mũthamaki wa gũthamakĩra Isiraeli.

Home