Go Back

1 Samueli Chapter 17

• 1. Na rĩrĩ, Afilisiti makĩũngania mbũtũ ciao cia ita, magĩcicokanĩrĩria Soko, itũũra rĩmwe rĩa Juda, makĩamba hema ciao gatagatĩ-inĩ ga Soko na Azeka, kũu Efesi-damimu.
• 2. Nake Saulu na andũ a Isiraeli magĩkorũo nĩmonganĩte makaamba hema ciao gĩtuamba kĩa Ela, magagĩthabania ita yao mahũrane na Afilisiti.
• 3. Nao Afilisiti makĩrũgama kĩrĩma-inĩ mwena ũmwe, nao Aisiraeli makĩrũgama kĩrĩma-inĩ o ro kũu mwena ũrĩa ũngĩ; hagakĩgĩa gĩtuamba gatagatĩ-inĩ kao.
• 4. Naho hau kĩraaro-inĩ kĩa Afilisiti hagĩkiumĩra njamba ĩmwe yetagwo Goliathu, wa itũũra rĩa Gathu, nakuo kũraiha na igũrũ kwayo kwarĩ mĩkono ĩtandatũ na irata rĩmwe.
• 5. Ningĩ yarĩ na ngũbia ya ita ya gĩcango mũtwe, na ĩkehumba nguo ya gĩthũri ya gĩcango, naguo ũritũ wayo warĩ wa cekeri cia gĩcango ngiri ithano.
• 6. Namo magũrũ mayo magekĩrũo mĩnyamũ ya mbaara ya gĩcango; na yarĩ na itimũ rĩa kĩberethi rĩa gĩcango rĩahocetio gatagatĩ-inĩ ga ciande ciayo.
• 7. Naguo mũtĩ wa itimũ rĩayo rĩa mwenjerere watariĩ o ta mũtĩ wa mũtambo ũrĩa ũtumaga tama; narĩo ithũmbĩ rĩa itimũ rĩayo rĩgĩthimwo-rĩ, rĩarĩ rĩa cekeri magana matandatũ cia kĩgera; nake mũkuui wa ngo yayo aamĩthiaga mbere.
• 8. Nayo ĩgĩkĩrũgama, ĩkĩanĩrĩra ĩkĩĩra itungati cia ita cia Isiraeli atĩrĩ, Nĩ kĩ gĩtũmĩte muume kwanyu mũgoka gũthaba ita yanyu gũkũ? Githĩ niĩ ndikĩrĩ Mũfilisiti; na inyuĩ githĩ mũtikĩrĩ ndungata cia Saulu? Wĩthurĩrei mũndũ ũmwe wanyu, aikũrũke oke harĩ niĩ.
• 9. Nake aahota kũhũrana na niĩ, na anjũrage-rĩ, tũgĩtuĩke ndungata cianyu; no wona ndamũhoota ndĩmũũrage, nĩmũgũtuĩka ndungata ciitũ, mũtũtungatagĩre.
• 10. Mũfilisiti ũcio agĩkiuga atĩrĩ, Nĩndamũnyararithia, inyuĩ itungati cia Isiraeli ũmũthĩ; mũtikĩ’he mũndũ ũmwe tũhũrane nake.
• 11. Nake Saulu na Isiraeli othe maaigua ciugo cia Mũfilisiti ũcio makĩmaka, magĩĩtigĩra mũno.
• 12. Na rĩrĩ, Daudi aarĩ mũrũ wa Mũefiratha wa Bethi-lehemu-juda wetagwo Jesii. Ũcio aarĩ na ariũ ake anana, na matukũ-inĩ ma Saulu aarĩ mũkũrũ, na nĩonagwo nĩ andũ ta atindĩkangĩte mĩaka ma.
• 13. Nao ariũ atatũ a Jesii arĩa akũrũ nĩmaathiĩte na Saulu kũu ita-inĩ; namo marĩĩtwa ma ariũ acio ake atatũ maathiĩte ita-inĩ nĩ Eliabu, wa irigithathi, na Abinadabu wa itiema, na Shama wa atatũ.
• 14. Nake Daudi nĩwe warĩ wa kĩhinganda; nao acio atatũ akũrũ nĩmaathiĩte na Saulu.
• 15. Nake Daudi agathiaga agĩcokaga oimĩte he Saulu nĩguo akarĩithie mbũri cia ithe kũu Bethi-lehemu.
• 16. Nake Mũfilisiti ũcio akĩnina matukũ mĩrongo ĩna, o athengagĩrĩra harĩ Aisiraeli o mũthenya, rũcinĩ na hwaĩ-inĩ, nĩguo eyonanie harĩ o.
• 17. Nake Jesii agĩkĩĩra mũriũ Daudi atĩrĩ, Ũkĩra woe eba ĩmwe ya ngano ĩno hĩhie nĩ ũndũ wa ariũ a nyũkwa, o na mĩgate ĩno ikũmi, ũtwarĩre ariũ a nyũkwa indo icio narua kũrĩa kĩraaro-inĩ.
• 18. Nacio cienyũ ici ikũmi cia ngorono ũcitwarĩre mũnene wa gĩtungati kĩao gĩa athigari ngiri; ũkĩrore ũrĩa ariũ a nyũkwa matariĩ, na ũnjokere na kĩmenyithia kĩa ũrĩa ũhoro wao ũtariĩ.
• 19. Na rĩrĩ, Saulu na acio, o na andũ arĩa angĩ othe a Isiraeli, maarĩ kĩanda-inĩ kĩa Ela makĩhũrana na Afilisiti.
• 20. Daudi agĩkĩroka gũũkĩra rũcinĩ tene, nacio mbũri agĩcitigĩra mũcirori, akĩoya indo, agĩthiĩ o ta ũrĩa Jesii aamwĩrĩte; agĩgĩkinya harĩa ngari ciaigĩtwo, o ihinda rĩrĩa mbũtũ cia athigari ciathiaga na mbere ikarũe ikiugagĩrĩria nĩ ũndũ wa mbaara ĩo.
• 21. Nao Aisiraeli na Afilisiti magĩthabania ita, o gĩtungati gĩkĩng’ethanĩra na kĩrĩa kĩngĩ.
• 22. Nake Daudi agĩgĩtiga kĩrĩa aakuuĩte na mũndũ ũrĩa waikaragia indo, agĩteng’era gĩkundi-inĩ gĩa ita, na aakinya harĩ ariũ a nyina akĩmageithia.
• 23. Na rĩrĩa aaragia nao-rĩ, atĩrĩrĩ, njamba io, ti Goliathu, Mũfilisiti wa kũu Gathu, ĩgĩkiumĩra mĩhari-inĩ ya Afilisiti, ĩkĩaria ciugo o ta iria yaaragia hĩndĩ ciothe, nake Daudi agĩciigua.
• 24. Nao andũ othe a Isiraeli mona mũndũ ũcio, makĩmũũrĩra, magĩkĩmwĩtigĩra mũno.
• 25. Andũ acio a Isiraeli magĩkĩũrania atĩrĩ, Hĩ! Ĩ nĩmũrona mũndũ ũyũ ũũkĩte? Ti-itherũ aroka kũnyararithia Isiraeli; na gũgũtuĩka atĩrĩ, atĩ mũndũ ũrĩa ũrĩmũũraga, mũthamaki nĩekũmũtongia, amũhe ũtonga mũingĩ, na amũhe mwarĩ; ningĩ atũme nyũmba ya ithe ĩrekerũo ũruti wa igoti thĩinĩ wa Isiraeli.
• 26. Nake Daudi agĩkĩaria na andũ arĩa maarũngiĩ hakuhĩ nake, akĩũria atĩrĩ, Ĩ atĩ mũndũ ũrĩa ũrĩũraga Mũfilisiti ũyũ, eherie rũmena harĩ Isiraeli, egwĩkwo atĩa? Nĩ ũndũ-rĩ, Mũfilisiti ũyũ ũtarĩ mũruu nake nũ, ũkũnyararithia itungati cia ita cia Ngai ũrĩa ũrĩ muoyo?
• 27. Nao andũ acio makĩmũcokeria ũhoro o ta ũcio, makiuga atĩrĩ, Ũguo nĩguo mũndũ ũrĩa ũrĩmũũraga egwĩkwo.
• 28. Nake Eliabu, mũrũ wa nyina ũrĩa mũkũrũ, akĩmũigua hĩndĩ ĩo aaragia na andũ acio; Eliabu agĩgĩcinwo nĩ marakara nĩ ũndũ wa Daudi, akĩmwĩra atĩrĩ, Nawe nĩ kĩ ũiyĩrĩte gũkũ? Na nũ ũtigĩire tũbũri tũrĩa tũtarĩ tũingĩ kũu werũ-inĩ? Nĩnjũĩ mwĩtĩo waku, na ũmaramari wa ngoro yaku; nĩ gũkorũo ũndũ ũrĩa ũtũmĩte ũũke gũkũ, nĩ atĩ wĩrorere mbaara.
• 29. Nake Daudi agĩkiuga atĩrĩ, Kaĩ ndagĩĩka atĩa? Githĩ to kũũria ndĩroria?
• 30. Agĩkĩhũgũka akĩmũtiga, akĩrora he mũndũ ũngĩ, akĩaria ũhoro o ta ũcio; nao andũ makĩmũcokeria ũhoro o ta ũcio wa mbere.
• 31. Na rĩrĩa ũhoro ũcio Daudi aaragia waiguirũo-rĩ, andũ makĩũiguithia Saulu; nake agĩkĩrekania agetwo.
• 32. Daudi agĩkĩĩra Saulu atĩrĩ, Ngoro ya mũndũ o na ũrĩkũ nĩĩtige kũringĩka nĩ ũndũ wake; nĩ niĩ, ndungata yaku, ngũthiĩ kũhũrana na Mũfilisiti ũcio.
• 33. Nake Saulu agĩkĩĩra Daudi atĩrĩ, Wee ndũngĩhota kũhũrana na Mũfilisiti ũcio; nĩ ũndũ wee ũrĩ o mũndũ mũnyinyi, nake aatuĩkire mũndũ wa ita kuuma arĩ o mũnyinyi.
• 34. Daudi agĩkĩĩra Saulu atĩrĩ, Niĩ ndungata yaku ndũire ndĩithagia mbũri cia baba, na rĩrĩa mũrũthi, kana nyamũ ĩrĩa ĩĩtagwo nduba, yanyita kagondu ka rũũru,
• 35. ngamĩrũmĩrĩra ngamĩgũtha, ngakaruta kanua kayo; na rĩrĩa yenda kũndũũgĩrĩra ngamĩnyita nderu ciayo, ngamĩgũtha, ngamĩũraga.
• 36. Niĩ ndungata yaku, nĩndoragire mũrũthi, o na nduba, cierĩ, na Mũfilisiti ũyũ ũtarĩ mũruu o nake egũtuĩka o ta ĩmwe yacio, kuona atĩ nĩanyararithĩtie itungati cia Ngai ũrĩa ũrĩ muoyo.
• 37. Ningĩ Daudi agĩkiuga atĩrĩ, Jehova ũrĩa wa’honokirie harĩ gĩthu kĩa mũrũthi, o na kĩa nduba-rĩ, nĩwe ũkũ’honokĩa guoko-inĩ kwa Mũfilisiti ũyũ. Saulu agĩkĩĩra Daudi atĩrĩ, Thiĩ, Jehova nĩegũikara hamwe nawe.
• 38. Nake Saulu agĩkĩhumba Daudi nguo ciake, agĩcoka akĩmwĩkĩra ngũbia ya gĩcango mũtwe, ningĩ akĩmũhumba nguo ya gĩthũri ya gĩcango.
• 39. Nake Daudi akĩĩoha rũhiũ rũa njora igũrũ rĩa nguo icio, agĩitĩka kũgeria gũkinyũkia, nĩ ũndũ ndaaciĩgeretie. Daudi agĩgĩcoka akĩĩra Saulu atĩrĩ, Ndingĩhota gũthiĩ na ici; nĩ ũndũ ndirĩ ndaciĩgeria. Nake Daudi agĩciruta.
• 40. Agĩkĩnyita rũthanju rũake na guoko, agĩĩthurĩra tũhiga tũtano tũnyoroku atũrutĩte karũũĩ-inĩ, agĩtwĩkĩra kondo-inĩ ka mũrĩithi karĩa aarĩ nako, na nĩ kondo karĩa ekagĩra tũindo twake; nakĩo kĩgũtha agakĩnyita na guoko; agĩgĩkuhĩhĩria Mũfilisiti ũcio.
• 41. Nake Mũfilisiti ũcio agĩthiathia agĩkuhĩhĩria Daudi; nake mũndũ ũrĩa wamũkuuagĩra ngo agĩthiĩ mbere yake.
• 42. Na rĩrĩa Mũfilisiti ũcio aabarangire akĩona Daudi-rĩ, akĩmũnyarara; nĩ ũndũ aarĩ mũndũ o ũguo mũnyinyi, mũtune mwĩrĩ, na mwega gĩthiithi.
• 43. Mũfilisiti ũcio agĩkĩĩra Daudi atĩrĩ, Kaĩ ndĩ ngui, atĩ nĩkĩo ũgũũka kũrĩ niĩ na thanju? Mũfilisiti ũcio agĩkĩruma Daudi akĩgwetaga ngai ciake.
• 44. Ningĩ Mũfilisiti ũcio akĩĩra Daudi atĩrĩ, Ũka harĩ niĩ, na nĩngũnengera nyamũ cia rĩera-inĩ, o na cia werũ, nyama cia mwĩrĩ waku.
• 45. Daudi agĩkĩĩra Mũfilisiti ũcio atĩrĩ, Wee ũgũũka harĩ niĩ na rũhiũ rũa njora, na itimũ rĩa mwenjerere, na rĩa kĩberethi; no rĩrĩ, niĩ ngũũka harĩ wee rĩĩtwa-inĩ rĩa Jehova Mũnene wa Ita, o Ngai ũrĩa mwene itungati cia Isiraeli, iria wee ũnyararithĩtie.
• 46. Mũthenya ũyũ wa ũmũthĩ nĩguo Jehova egũkũneana moko-inĩ makwa; na nĩngũkũgũtha, njoke ngũtinie kĩongo kĩehere mwĩrĩ-inĩ waku; nacio ciimba cia andũ a ita ya Afilisiti, nĩngũcineana ũmũthĩ harĩ nyamũ cia rĩera-inĩ o na cia gĩthaka cia gũkũ thĩ, nĩ getha andũ othe a gũkũ thĩ mamenye atĩ Ngai wa Isiraeli e hamwe nao;
• 47. ningĩ nĩ getha ũũngano ũyũ wothe ũmenye atĩ Jehova ndahonokanagia na rũhiũ rũa njora, kana itimũ; nĩ ũndũ ita nĩ cia Jehova, na nĩekũmũneana moko-inĩ maitũ.
• 48. Na gũgĩkinya atĩrĩ, atĩ hĩndĩ ĩrĩa Mũfilisiti ũcio aagwatire gũthiĩ gũkuhĩhĩria Daudi, nĩguo macemanie-rĩ, Daudi akĩhiũha, agĩteng’era arorete harĩa ita yanunĩtwo, agatũnge Mũfilisiti ũcio.
• 49. Daudi agĩgĩikia guoko kondo-inĩ gake akĩruta kahiga, akĩhiũria kĩgũtha, akĩgũtha Mũfilisiti ũcio o thiithi; nako kahiga kau gagĩtonyerera na thĩinĩ wa thiithi wake, akĩgũa, ũthiũ ũgĩtheca thĩ.
• 50. Ũguo nĩguo Daudi aakĩhootire Mũfilisiti ũcio na kĩgũtha na kahiga, akĩgũtha Mũfilisiti ũcio, akĩmũũraga; no Daudi ndaarĩ na rũhiũ rũa njora guoko.
• 51. Daudi agĩgĩteng’era, akĩrũgama harĩ Mũfilisiti ũcio e mũgũu thĩ, akĩnyita rũhiũ rũake akĩrũcomora njora, akĩmũũraga naruo, akĩmũtinia mũtwe. Na rĩrĩa Afilisiti monire atĩ njamba yao ĩĩ gũkua, makĩũra.
• 52. Nao andũ a Isiraeli na Juda magĩũkĩra, makiugĩrĩria, makĩrũmĩrĩra Afilisiti na ihenya, makĩmakinyia Gai, o na ihingo-inĩ cia itũũra rĩa Ekironi. Nao Afilisiti arĩa maagurarĩte makĩgũa njĩra-inĩ ĩrĩa ĩthiaga Shaaraimu, o nginya Gathu, o na Ekironi.
• 53. Nacio ciana cia Isiraeli ikĩhũndũka ciumĩte gũteng’eria Afilisiti, igĩgĩtaha indo kĩraaro-inĩ kĩao.
• 54. Nake Daudi akĩoya mũtwe wa Mũfilisiti ũcio, akĩũtwara Jerusalemu; no indo ciake cia mbaara agĩciiga hema-inĩ yake.
• 55. Na rĩrĩa Saulu onire Daudi akiumagara akahũrane na Mũfilisiti ũcio, akĩũria Abineri, mũnene wa ita yake, atĩrĩ, Abineri, mwanake ũyũ nĩ mũrũ wa ũ? Abineri akiuga atĩrĩ, O ta ũrĩa ngoro yaku ĩtũũraga muoyo, wee mũthamaki-rĩ, ndingĩhota gũkwĩra atĩ nĩ wa ng’ania.
• 56. Ningĩ mũthamaki akĩmwĩra atĩrĩ, Ta gĩtuĩrie ũmenye ithe wa kamwana gaka.
• 57. Tondũ ũcio rĩrĩa Daudi aacokire oimĩte kũũraga Mũfilisiti ũcio, Abineri akĩmuoya, akĩmũtwara mbere ya Saulu anyitĩte mũtwe wa Mũfilisiti ũcio na guoko.
• 58. Nake Saulu agĩkĩmũũria atĩrĩ, Wĩ mũrũ wa ũ, mwanake ũyũ? Nake Daudi agĩcokia atĩrĩ, Ndĩ mũrũ wa ndungata yaku Jesii, Mũbethi-lehemu.

Home