Go Back

1 Samueli Chapter 9

• 1. Na rĩrĩ, kwarĩ mũndũ ũmwe wa Benjamini wetagwo Kishu wa Abieli, mũrũ wa Zeroru wa Bekorathu, mũrũ wa Afia, wa Mũbenjamini; na aarĩ njamba ĩrĩ hinya.
• 2. Nake aarĩ na mũriũ wetagwo Saulu, mwanake mũthaka ma; na thĩinĩ wa ciana cia Isiraeli ciothe, gũtiarĩ mũndũ mũthaka kũmũkĩra; ningĩ aakĩrĩte andũ arĩa angĩ othe kũraiha kuuma ciande-inĩ ciake gũcoka na kũu igũrũ.
• 3. Nacio ndigiri cia Kishu, ithe wa Saulu, ikĩũra. Nake Kishu agĩkĩĩra mũriũ Saulu atĩrĩ, Oya mũndũ ũmwe wa ndungata ici, mũũkĩre mũthiĩ mũgacarie ndigiri.
• 4. Nake agĩkĩgera bũrũri wothe ũrĩa wĩ irĩma nyingĩ wa Efiraimu, na bũrũri wothe wa Shalisha, no matiacionire; ningĩ makĩgera bũrũri wothe wa Shaalimu, igĩkĩagwo kuo; magĩcoka makĩgera bũrũri wothe wa Benjamini, no matiacionire.
• 5. Na rĩrĩ, maakinya bũrũri wa Zufu, Saulu akĩĩra ndungata yake ĩrĩa maarĩ nayo atĩrĩ, Reka tũhũndũke, nĩ getha hihi baba ndagakorũo nĩatigĩte kũrũmbũiya ũhoro wa ndigiri, agacoka gũtangĩka nĩ ũndũ witũ.
• 6. Nake agĩcokia ũũ: Atĩrĩrĩ, itũũra-inĩ rĩrĩ kwĩ mũndũ wa Ngai, na nĩ mũndũ mũtĩĩku, na maũndũ mothe marĩa oigaga, ti-itherũ nĩmonekaga; reke tũthiĩ kuo; hihi no gũkorũo aahota gũtũhe ũhoro ũkoniĩ rũgendo rũrũ tũgwete.
• 7. Ningĩ Saulu akĩĩra ndungata yake atĩrĩ, No rĩrĩ, rĩu o na twagĩthiĩ kuo-rĩ, tũgũgĩtwarĩra mũndũ ũcio kĩ? Kuona atĩ irio nĩininũkĩte ciondo-inĩ ciitũ, na gũtirĩ kĩndũ twĩ nakĩo gĩa kũhe mũndũ ũcio wa Ngai-rĩ, kĩrĩa tũkĩrĩ nakĩo nĩ kĩ?
• 8. Ndungata ĩo ĩgĩgĩcokeria Saulu rĩngĩ ĩkiuga ũũ: Atĩrĩrĩ, niĩ ndĩ na gĩcunjĩ gĩa kana gĩa cekeri ya betha; kĩu nĩkĩo ngũthiĩ kũhe mũndũ ũcio wa Ngai, nĩguo atwĩre njĩra ĩrĩa tũkũgera.
• 9. (Na rĩrĩ, mahinda ma tene, kũu Isiraeli, rĩrĩa mũndũ aathiaga gũtuĩria ũhoro kwĩ Ngai-rĩ, ũũ nĩguo oigaga, Ũka tũthiĩ kwĩ mũndũ ũrĩa muoni maũndũ; nĩ gũkorũo mũndũ ũrĩa wĩtagwo Mũnabii matukũ maya-rĩ, tene etagwo Muoni maũndũ.)
• 10. Saulu agĩkĩĩra ndungata ĩo yake atĩrĩ, Ũgũkiuga wega; nĩtũgĩthiĩ. Magĩgĩthiĩ itũũra rĩu mũndũ ũcio wa Ngai aarĩ.
• 11. Na rĩrĩa maambataga ihaicĩro-inĩ makinye itũũra rĩu, makĩona airĩtu magĩthiĩ gũtaha maĩ, makĩmoria atĩrĩ, Ĩ mũndũ ũrĩa muoni maũndũ e gũkũ?
• 12. Nao magĩkĩmacokeria makiuga atĩrĩ, E kuo; na atĩrĩrĩ, e hau mbere yanyu; hiũhahiũhai, amu okire ũmũthĩ gũkũ itũũra-inĩ nĩ ũndũ andũ me na igongona rĩkũrutĩrũo itĩri-inĩ harĩa hatũũgĩru.
• 13. Na mwatonya itũũra, nĩmũkũmuona o narua atanathiĩ itĩri-inĩ rĩu kũrĩa irio; nĩ ũndũ andũ arĩa me ho matingĩrĩa irio atanakinya ho, nĩ ũndũ nĩwe ũrathimithagia igongona, na thutha wa ũguo arĩa metĩtwo magagĩcoka kũrĩa. Tondũ ũcio kĩambatei, nĩ ũndũ rĩu noguo mũngĩmuona.
• 14. Magĩkĩambata, magĩkinya kũu itũũra-inĩ, na rĩrĩa maatonyaga itũũra, atĩrĩrĩ, Samueli akĩmoimĩrĩra, magĩturumana akĩambata athiĩ itĩri-inĩ rĩu.
• 15. Na rĩrĩ, Jehova nĩonetie Samueli ũhoro, ta ira, Saulu atanathiĩ kuo, akamwĩra atĩrĩ,
• 16. Rũciũ, ihinda o ta rĩrĩ, nĩngakũrehithĩrie mũndũ oimĩte bũrũri wa Benjamini, nawe nĩũkamũitĩrĩria maguta atuĩke mũtongoria wa andũ akwa Isiraeli, na nĩakahonokia andũ akwa harĩ Afilisiti; nĩ ũndũ nĩmbarĩte ngona andũ akwa, nĩ gũkorũo kĩrĩro kĩao nĩkĩnginyĩire.
• 17. Na rĩrĩa Samueli onire Saulu-rĩ, Jehova akĩmwĩra atĩrĩ, Ta rora mũndũ ũrĩa ndĩrakũheire ũhoro wake! Mũndũ ũyũ nĩwe ũkũgĩa na ũhoti wa gwatha andũ akwa.
• 18. Hĩndĩ ĩo Saulu agĩgĩkuhĩhĩria Samueli kĩhingo-inĩ gĩa ĩtũũra, akiuga atĩrĩ, Ta njĩrĩra harĩa nyũmba ya mũndũ ũrĩa muoni maũndũ ĩrĩ.
• 19. Nake Samueli agĩcokeria Saulu, akiuga atĩrĩ, Nĩ niĩ mũndũ ũcio muoni maũndũ; ta ngĩa mbere twambate itĩri-inĩ, nĩ gũkorũo ũmũthĩ mũkũrĩanĩra irio na niĩ; na rũciũ rũcinĩ nĩguo ngakũreka ũthiĩ, na nĩguo ngakwĩra maũndũ mothe marĩa marĩ ngoro-inĩ yaku.
• 20. Naho ha ũhoro wa ndigiri ciaku iria ciorire mĩthenya ĩtatũ ĩthirĩte-rĩ, tiga gũcoka kũrũmbũiya ũhoro wacio, nĩ ũndũ nĩ nyoneku. O namo maũndũ mothe marĩa meriragĩrio thĩinĩ wa Isiraeli-rĩ, kaĩ me ma ũ? Githĩ ti maku, o na ma nyũmba ya thoguo yothe?
• 21. Nake Saulu agĩcokia, akiuga atĩrĩ, Githĩ ndĩkĩrĩ Mũbenjamini, wa mũhĩrĩga ũrĩa mũnyinyi gũkĩra ĩrĩa ĩngĩ yothe ya Isiraeli? Ningĩ-rĩ, githĩ mbarĩ iitũ tiyo nyinyi gũkĩra mbarĩ iria ingĩ ciothe cia mũhĩrĩga ũcio wa Benjamini? Kuona nĩ ũguo-rĩ, nĩ kĩ gĩgũgĩtũma warie na niĩ ndeto ta icio?
• 22. Nake Samueli agĩkĩoya Saulu, na ndungata yake, akĩmatwara nyũmba ĩrĩa yarĩagĩrũo, akĩmaikaria handũ ha andũ arĩa atĩĩku thĩinĩ wa arĩa metĩtwo; nao maarĩ ta andũ mĩrongo ĩtatũ.
• 23. Samueli agĩkĩĩra mũrugi wa irio atĩrĩ, Ta rehe rũgai rũrĩa ndĩrakũnengerire, o rũu ndĩrakũheire ũhoro waruo atĩ, Ũrũige handũ mwanya.
• 24. Mũrugi ũcio agĩkĩoya kĩande hamwe na nyama ĩrĩa yarĩ igũrũ rĩakĩo agĩkĩiga harĩ Saulu. Nake Samueli akiuga ũũ: Atĩrĩrĩ, gĩkĩ nĩkĩo kĩraigĩtwo! Kĩoe ũrĩe; nĩ ũndũ hĩndĩ ĩrĩa ndĩroigire atĩ nĩnjĩtĩire andũ gĩathĩ, nĩguo ũraigĩirũo gĩkĩ nĩ ũndũ wa ihinda rĩrĩ tũrĩ. Nake Saulu magĩkĩrĩanĩra irio na Samueli mũthenya ũcio.
• 25. Na rĩrĩa maakorirũo maikũrũkĩte moimĩte itĩri-inĩ magatonya itũũra-rĩ, Samueli makĩaranĩria na Saulu marĩ nyũmba igũrũ.
• 26. Nao magĩkĩroka gũũkĩra rũcinĩ tene; na gũgĩkinya atĩrĩ, atĩ rĩrĩa gwatuire gũkĩa, Samueli agĩĩta Saulu kũu nyũmba igũrũ, akĩmwĩra atĩrĩ, Ũkĩra, nĩguo nguumagarie, wĩthiĩre. Saulu agĩkĩarahũka, nao erĩ, we mwene na Samueli, makiumania magĩkinya njĩra-inĩ.
• 27. Nao rĩrĩa maaikũrũkaga makinye mũthia-inĩ wa itũũra rĩu, Samueli akĩĩra Saulu atĩrĩ, Ta ĩra ndungata yaku ĩhĩtũke, ĩthiage mbere iitũ, (nayo ĩgĩkĩhĩtũka,) no rĩrĩ, wee amba ũrũgame hanini hau ũrĩ, nĩ getha ngũiguithie ũhoro ũrĩa Ngai oigĩte.

Home